Shimbuloqda qozoq tilini bilishni istamagan kafe xodimi ishdan bo‘shatildi

Olmaotadagi mashhur «Shimbuloq» tog‘-kurortida joylashgan Gusto kafesida til masalasi bilan bog‘liq yirik mojaro kelib chiqdi.

Ijtimoiy tarmoqlarda tarqalgan videoda kafe xodimasi mijozga davlat tilida xizmat ko‘rsatishdan bosh tortgani aks etgan. Xodima o‘z pozitsiyasini quyidagicha tushuntirgan:

«Men SSSRda tug‘ilganman, qozoq tilini bilishga majbur emasman».

«Bu mamlakat Qozog‘iston deya nomlangan. Siz uning tilini bilishga majbursiz» deya mijoz undan oxirgi bor talab qiladi.

«Men sizning tilingizni o‘rganishga majbur emasman» deya kafe xodimi mijozidan uzoqlashadi.

Bu gaplar qozog‘istonlik foydalanuvchilarning keskin e'tiroziga sabab bo‘ldi. Video tez fursatda viruslashib, jamoatchilik o‘rtasida katta muhokamalarga yo‘l ochdi.

Bir sutka ichida kafening Instagram sahifasida 30 mingdan ortiq norozilik izohlari qoldirildi.

Kafe rahbariyati vaziyatga tezkor munosabat bildirib, ushbu xodima bilan mehnat shartnomasi bekor qilinganini ma'lum qildi.

Muassasa o‘z mijozlaridan uzr so‘rab, davlat tiliga va milliy qadriyatlarga hurmat bilan yondashishini ta'kidladi.