IIV akademiyasida qonunbuzarliklar

O‘zini Ichki ishlar vazirligi akademiyasining 2-kurs kursantlari deb tanishtirgan manbalar Eltuz tahririyatiga murojaat qilib, ta'lim muassasasida qator jiddiy qonunbuzarliklar mavjudligini bildirdi.

Murojaatda aytilishicha, Ichki ishlar vazirligi akademiyasida ta'lim sifati emas, pora olish va tanish-bilish orqali masalalarni hal qilish holatlari ustuvor bo‘lib qolgan. 

Manbalarga ko‘ra, akademiyaga ishga kirish uchun o‘rtacha 3000 AQSh dollari talab etiladi, tanish-bilish bo‘lmagan hollarda esa bu deyarli imkonsiz.

Shuningdek, murojaatda akademiya rahbari – Rustam Abdug‘anievich Hatamov faoliyatiga oid og‘ir ayblovlar ilgari surilgan. Kursantlar ta'kidlashicha, lavozim yoki ishda yengilliklarga erishish uchun ayrim ayollardan noqonuniy tarzda foydalanish holatlari mavjud ekani butun akademiyaga ma'lum, bu esa xizmat etikasi va qonunchilikka zid hisoblanadi.

Murojaatda yana aytilishicha, qoidabuzarlik sodir etgan kursantlar tanish-bilish yoki pul orqali jazodan qutulib qolishi mumkin. Masalan, telefon bilan qo‘lga tushgan kursantlar 10 million so‘m miqdorida pora berib o‘qishdan haydalmaslikka erishgani haqida da'volar keltirilgan.

Kursantlar akademiya ta'lim muassasasidan ko‘ra, tahqirlash, haqorat, poraxo‘rlik va boshqa noqonuniy holatlar avj olgan joyga aylanib qolganini ta'kidlamoqda. Ular o‘z xavfsizligidan qo‘rqib, ismlarini oshkor qilmaslikni so‘ragan.

Tahririyat mazkur da'volar yuzasidan rasmiy idoralar izohiga ochiqligini ma'lum qiladi.