Surxondaryoda kuyov qaynotasini o‘ldirdi

2025 yil 28 dekabr kuni Surxondaryo viloyatining Uzun tumanida kelinchakning qaynotasi va boshqa qarindoshlari oilaviy nizoni tinch yo‘l bilan hal qilish maqsadida kuyovning uyiga borishgan. Ammo bu urinish ommaviy vahshiylikka aylanib, kuyov tarafdan 5-7 nafar shaxs  temir buyumlar bilan qurollanib, qaynota Raqibov Oyatulloning bosh qismiga o‘ta shafqatsizlik bilan zarba berishgan. Hatto u hushsiz holga tushganidan keyin ham do‘pposlashda davom etilgan. Natijada Raqibov Oyatullo operatsiya vaqtida vafot etgan. Shuningdek, Raqibov Saidga ham og‘ir tan jarohati yetkazilgan va u ayni damda shifoxonada og‘ir ahvolda.

Kaltaklash kamlik qilgandek og‘ir ahvoldagi qaynota shifoxonaga olib ketilayotganda kuyovning qarindoshlari tomonidan yo‘l to‘sib qo‘yilgan. Mashina haydovchisi ham kaltaklanib, tahdid qilingan.

Bemor davlat shifoxonasiga olib kelinganidan keyin ham shifokorlar e'tiborsizligi va mas'uliyatsizligi tufayli 4 soat davomida tibbiy yordamsiz qolgan. Hattoki, bemorni qabul qilishdan bosh tortishgan.