Andijonda maktab o‘quvchilari «Majburiy ijro» binosi atrofini tozalamoqda

23 oktyabr kuni «Eltuz» nashrining mobil muxbiri jo‘natgan fotosuratda supurgi ko‘targan maktab formasidagi bir guruh maktab o‘quvchilarini ko‘rish mumkin.

Ular Respublika Bosh prokuraturasi huzuridagi «Majburiy ijro byurosi» Andijon viloyat boshqarmasi shahar bo‘limi binosi joylashgan ko‘chani tozalashmoqda.

Shahar maktablaridagi minglab o‘qituvchilar paxta terimiga va terimchilar yollashga safarbar qilinarkan, Andijon shahrida o‘quvchilarning ko‘cha tozalayotganini tez-tez kuzatish mumkin.

Vaziyatni chuqurroq o‘rganishga harakat qilgan, «Eltuz» nashri muxbiri, shaxar obodonlashtirish bo‘limi xodimlarini izladi.

Ularni yo‘l chekkasida, ish qurollarini yig‘ishtirib, formalarini taglariga solib o‘tirgan holda topdi.

Ulardan birining «Eltuz» muxbiriga aytishicha, Andijon shahar obodonlashtirish bo‘limi xizmatchilari ancha vaqtdan beri oyliklari berilmayotgani bois, shu tarzda bepul majburiy ishlashni to‘xtatishgan.

Shu paytga qadar viloyat hokimi buyrug‘i bilan xaftaning istalgan kuni o‘tkaziladigan «shanbaliklar»ga Andijonda asosan maktab o‘qituvchilari jalb qilinardi.

O‘qituvchilar paxta terimiga jalb qilinarkan, ular o‘rnini asta sekin darsxonalarda «bekor o‘tirgan» maktab o‘quvchilari egallamoqda.

Eltuz.com