Shvetsiyada terrorga aloqador olti o‘zbekning sudi belgilandi

Shvetsiya poytaxti Ctokgolmning Solna tumani sudida terrorchilikni moliyalash va teraktlar tayyorlashda gumon qilinib hibsga olingan 6 nafar o‘zbek ustidan sud 7 yanvar kuniga belgilandi.

«Eltuz» nashri olgan tergov hujjatlariga ko‘ra, sudlanuvchilar Akromjon Ergashev 34 yashar, G‘ulom Tojiev 39 yashar, David Idrisson 46 yashar, Shoahmad Mahmudov Shorasul o‘g‘li 24 yashar, Baxtiyor Umarov 30 yashar, Otabek Abdullaev 39 yashardir. 

Sudlanuvchilarning besh nafari O‘zbekiston fuqarosi bo‘lib, yana biri – Otabek Abdullaev qirg‘izistonlikdir. 

Shuningdek, ular Shvetsiyaning turli hududlarida – Stromsund, Ostersund, Kista, Yordbro, Sponga, Tebu tumanlarida yashashgani, ulardan David Idrisson (asl ismi Farhod Toshmuhammedov) 2008 yili Shvetsiyaga kelgach, pasportidagi ism-sharifini o‘zgartirib olgani «Eltuz»ga ma'lum (suratda chapdan birinchi).  

Shved nashrlariga ko‘ra, barcha sudlanuvchilarga «Islomiy davlat» (IShID terror tashkiloti)ga pul jo‘natmalari tashkil qilish ayblovi ilgari surilmoqda.

Abdullaev, Idrisson va Mahmudov pul jo‘natmalaridan tashqari Shvetsiyada teraktlar uyushtirishga tayyorgarlik ko‘rishgani, buning uchun ular portlovchi modda uchun yuz litrdan ortiq kaltsiy gipoxloriti, vodorod, kaliy gidroksidi kaliy va sulfurik kislota yig‘ishgan. Ular ratsiyalar, gazniqoblar va boshqa turli himoya vositalari, maxsus qo‘lqoplar xarid qilishgan.

Bundan tashqari, Idrisson (Toshmuhammedov) 49 gramm giyohvandlik moddasi saqlashda, Abdullaev esa qalbaki hujjatlar bilan bankda hisob ochishda ayblanmoqda. Umarov pul o‘tkazmalarida soxta grek pasportidan foydalangan.

Cudlanuvchilarning biri Mahmudov 2018 yilning sentyabrida hibsga olingan, keyinchalik sud uni qo‘yib yuborgan. Abdullaev, Ergashev, Idrisson va Umarov 2018 yilning mayidan buyon qamoqda qolishmoqda.

«Eltuz» nashri shved sudi 2018 yilning 31 may kuni terror hujumi tayyorlashda gumon qilingan to‘rt nafar o‘zbekni hibsga olish haqida qaror chiqargani haqida yozgan edi.

Eltuz.com