Xo‘jaylidagi qadimiy obidani saqlashni vazir o‘z nazoratiga oldi

Mahalliy mulozimlarning «qabr biznesiga» aylantirilgan Xo‘jaylidagi Xalifa Erajab masjidi va Mazdakxon maqbarasini vandallardan himoya qilishni O‘zbekiston sport va turizm vaziri Aziz Abduhakimovning o‘zi shaxsan nazoratga oldi.

«Vaziyatning o‘ta ayanchligi, masalliy mulozimlarning qadim osori-atiqalarga jinoyatkorona bepisand munosabati bois vaziyatni sohaning birinchi rahbari o‘zi nazorat qilishini taqozo etadi», deydi «Eltuz»ning vazirga yaqin manbasi.

Joriy yil noyabr oyi oxirida tarmoqlarda Xo‘jaylidagi Mazdakxon maqbarasi ënida yangi paydo bo‘lgan «evroremont» qabr tasvirlari muhokama qilingan edi. Vazirlar Mahkamasining 2011 yil 4 apreldagi qaroriga ko‘ra, qadimiy ëdgorliklar ëniga mayit dafn qilish taqiqlanadi.

1 dekabr kuni Madaniy meros departamenti rahbari professor Tursunali Qo‘ziev boshchiligidagi ishchi guruh 10-asr ëdgorligi bo‘lgan Mazdakxon maqbarasi ënida iznsiz paydo bo‘laëtgan qabristonni borib ko‘rdi. Buning ortidan Qoraqalpog‘iston prokuraturasi qadimiy obidaga zarar yetkazilishi faktlari bo‘yicha tekshiruv boshladi. Maqbara joylashgan joyni qiëmat soati deya ishonuvchilar sababli bu joyga ziërat turizmi ommalashgan.

Eltuz.com