Elchi atay kelgan ko‘rgazmadan mulozimlar nega qochdi?

Buyuk chex imprescionisti asarini chex elchisi Urganchda taqdim qildi

Urganch zamonaviy san'at muzeyida Germaniyadagi “Yuzuk” tashkiloti tarafidan 20-asrdagi buyuk imprescionist rassom Otto Bubinechekning qimmatbaho asari muzeyga sovg‘a qilindi.

Taqdimot marosimida Chexiya respublikasining O‘zbekiston, Turkmaniston va Tojikistondagi favqulodda va muxtor elchisi Vaslav Yilek mamnuniyat bilan qatnashdi. Lekin tadbirda O‘zbekiston madaniy meros idorasi Xorazm viloyat va Urganch shahri amaldorlaridan biror kishi qatnashmadi.

Vaholanki asar O‘zbekistonning Frankfurtdagi bosh konsulxonasi, Tashqi ishlar vazirligi, O‘zbekiston-Chexiya do‘stlik jamiyati ishtirokida O‘zbekistonga olib kelingan edi. Tadbirda so‘zga chiqqan elchi Vaslav Yilek tasviriy san'atning xalqlar o‘rtasida mustahkam ko‘prik bo‘la olishini Urganch muzeyi misolida ko‘rganidan mamnuniyat izhor qildi:

(video, elchi).

Hali Chexiya davlati tashkil bo‘lmasidan oldin o‘tgan asr o‘rtalarida muzey atrofida millat birlasha olishini aytgan rassom Otto Bubinechek Urganch muzeyiga hadya qilingan asari haqida Germaniyadan tashrif buyurgan “Yuzuk” tashkiloti rahbari Dilbar G‘afforova gapirdi.

(video, Dilbar G‘afforova).

Shuningdek, “Yuzuk” tashkiloti “Milliy merosga mening tuhfam” degan umummilliy dastur doirasida hozirda Amerikada yashayotgan rassom Davron Yo‘ldoshevning “Onazamin”, hozir Germaniyada istiqomat qilayotgan rassom Shuhrat Bobojonovning “Arslon ovi” rang-tasvir asarlarini ham muzeyga beg‘araz hadya qildi.

Tadbirda O‘zbekiston zamonaviy muzeyi direktori Shirin Tosheva berilgan sovg‘alar yuzasidan minnatdorchilik bildirdi va elchi janobi oliylariga Urganch muzeyi haqidagi kitobni taqdim qildi.

Zamonaviy o‘zbek rassomlarining minglab asarlarini o‘z ichiga olgan Urganch muzeyi 1984-yilda BMT madaniyat idorasi YuNYeSKO qo‘llovi bilan ochilgan edi.

Ko‘rsatuvlarimizni kuzatib boring, Eltuz O‘zbekiston madaniyati va san'atiga oid yangiliklarni yoritishda davom etadi. Kanalimizga obuna bo‘lishni unutmang.