Bektemirda konstitutsion tuzum tugab, amirlik paydo bo‘ldimi?

Bektemir tuman hokimi Nurilla Abduraxmanov «Xuton» masjidini kengaytirish maqsadida tahoratxona qurish uchun davlat balansidagi uyni beg‘araz berish haqida qaror qabul qildi. 

Bu hujjat amaldagi qonunchilikka mos kelmaydi. Chunki hokim davlat mulkini tekin berishga vakolatli emas. Bunday huquq faqat Prezidentga berilgan. Demak, tuman hokimi o‘zini Prezident bilan teng ko‘radi yoki o‘zini amir deb biladi. 

Asosiysi, masjid davlat organi hisoblanmaydi, va davlat mulkini ularga bepul ajratishning yuridik asosi yo‘q. 

Qarorning yagona asosi sifatida «mahalla yig‘ini murojaati» ko‘rsatilgan, biroq bunday murojaat hokimga davlat mulkini berish huquqini bermaydi. 

Yana bir jiddiy tomoni –  bu qaror Konstitutsiyaning 61-moddasidagi tamoyilga ham zid: «Diniy tashkilotlar davlatdan ajratilgan». Shuningdek, davlat diniy tashkilotlarni moliyaviy yoki mulkiy resurslar bilan ta'minlamaydi. 

Davlat mulkini masjid ehtiyojiga tekin berish — sekulyarlik tamoyilini buzish bilan bir xil.