Karimov o‘limidan keyin ham o‘zgarmagan zehniyat

Konstitutsiyada prezident faqat ikki marta saylanish huquqiga ega ekani belgilanganiga qaramay, O‘zbekistonning marhum rahbari 25 yil davomida lavozimidan ketmay, faqat mansabidan o‘lib qutulgani ortidan ham bir an'ana o‘zgarmadi.

O‘zbekiston nashrlari xalqaro protokol talabiga ko‘ra, dunyo mamlakatlari va yirik kompaniyalar rahbarlari nomidan yangi saylagan prezident nomiga yo‘llangan tabriklarni sahifalab chop etishni davom ettirmoqda.

Tuzum mafkurachilari hisob-kitobni to‘g‘ri olgan. Matbuotda bu tabriklarni o‘qigan 10 ta odamdan to‘qqiztasi, albatta, dunyo rahbarlari O‘zbekistonning yangi yetakchisi hurmatiga shunday noma yo‘llagan, deb ishonadi. Chunki ular yillar davomida siyosatga aralashtirilmagan. Faqat mafkura ta'sirida fikri shakllangan, xolos.

«Xalq so‘zi» (14.12) ham ana shunday o‘nlab tabriklarni deyarli bir sahifaga joylab, mafkuraboshilarning talablarini qondirdi.

Shuningdek, gazetada deputat va senatorning Senatning kuni-kecha bo‘lib o‘tgan majlisida ko‘rilgan masalalarga oid fikr-mulohazalari e'lon qilindi.

Qanday masalalar ko‘rib chiqilgani haqida gapirish ortiqcha bizningcha. Chunki fikr bildiruvchilar ularning barchasi to‘g‘risida faqat ijobiy gapirgan. Zero, O‘zbekiston sharoitida boshqacha bo‘lishi mumkin ham emas.

Xususan, «Korruptsiyaga qarshi kurashish to‘g‘risida»gi qonun yuzasidan fikr bildirgan deputat uning qanchalik olamshumulligini aytgan, ammo mamlakatdagi butun tuzum shu illat botqog‘iga botgani, undan oson chiqish mumkin emasligi haqida gapirishni «esdan chiqarib qo‘ygan».

Senatorlar esa saylangan prezidentning Konstitutsiya kunidagi ma'ruzasini «kontseptual» deya baholab, uning inson huquqlari, demokratiyani qaror toptirishdagi ahamiyati haqida og‘iz ko‘pirtirib gapirgan.

Mushtariylarimizga bir boshqotirmani yechishni tavsiya etmoqchimiz: shu kunlarda aytilayotgan fikrlarning marhum prezident davrida va bugungi davlat rahbari amalga kirishgan kunlardagi mulohazalardan farqi nimada?

Bahodir Sharif
O‘zbekistonlik gazetxon tahallusi
Eltuz.com