«Men sevaman, sen sevasanmu?»

Turkmaniston prezidenti Gurbanguli Berdimuhamedovning O‘zbekistonga tashrifi munosabati bilan 24 aprel kuni Xorazm viloyatida minglab talaba va o‘quvchi ko‘chalarga chiqarilib, ertalabdan kechgacha yo‘l yoqasida turishga majbur etildi.

«Berdimuhamedovning Urganchga tashrifi xuddi Turkmanistondagi kabi shaxsga sig‘inish – «Alya, Orqadog‘!» usulida o‘tyapti. Biror soya-salqin joy yo‘q. Ayrim qizlar hushidan ketib ham qolishyapti», dedi «Eltuz» bilan suhbatlashgan talaba.

Shuningdek, uning «Eltuz»ga bildirishicha, bir kun oldin Berdimuhamedovning kelishi munosabati bilan Urganch shahriga kiradigan barcha yo‘llar berkitilgan. Ular shu kuni uylariga keta olmay, tanishlarinikida qolishga majbur bo‘lishgan.

Kollejda o‘qiydigan barcha qizlarga guldor adrasdan tikilgan bir xil kuylaklar kiydirishgan va ular bir hafta davomida prezident qarshisiga peshvoz chiqishga tayyorgarlik ko‘rishgan.

Bir kun oldin mamlakat poytaxtida ham talabalar va o‘quvchilar prezident korteji o‘tadigan yo‘llarga ikki davlat bayroqchalarini ushlagan holda saflanishgan edi.

Turkman Orqadog‘i sharafiga Toshkentda alohida yoshlar sayilgohi ham ochilgan edi.

Yangi hajviy suratida rassom Tuz sevgili yori bugun uni emas, turkman prezidentini sevishi kerak bo‘lgan xorazmlik yigitning ahvolini aks ettirdi.

Rassom Tuz
Eltuz.com