«Sehrgar» Akmal Saidov haqida

​​Xalqaro press-klubda matbuot anjumani bo‘lib o‘tibdi, unda Inson huquqlari bo‘yicha Milliy markaz direktori Akmal Saidov bunday gaplarni aytib o‘tibdi:

«Xodimim Andijonga bordi. Marhumning oilasida bo‘ldi. Oila a'zolari undan nimani so‘rashganini bilasizmi? «Bizni blogerlar qiynab yuborishdi. Bizning qayg‘umizdan ular nima qilishmoqchi ekanini bilasizmi? Nima qilishmoqchi ekanliklarini bilmaymiz. Bizlarni blogerlardan himoya qiling». Bu marhum oila a'zolarining so‘zlari».

Men shaxsan Akmal Saidovni bir necha o‘n yillar davomida g‘arbni ko‘zi uchun yo‘q narsalarni bor qilib, bor narsalarni yo‘q qilib kelgan «yuridicheskiy sehrgar»lardan biri, deb bilaman.

O‘sha mash'um Jasliqni g‘arbga bolalar oromgohi kabi ko‘rsatishga urinishlaringizni bilamiz. O‘zbekiston bolalar mehnatidan foydalanilmasligini jahl bilan gapirganingizni o‘sha paytda noyabr oyida paxta dalasida qo‘llari sovqotgan bolalar paxta bilan band bo‘lib o‘qishmagan bo‘lsa-da, biz o‘qiganmiz.

Agar blogerlar bo‘lmaganida o‘sha Andijondagi keysning qopqog‘i yopiqligicha qolib ketardi, deb ham ishonaman. O‘sha marhum yigit oila a'zolarining «shu videoni chiqarib beringlar», deb o‘zlari yozgan gaplarining skrinlari ham bor.

Balki ular rostdan ham shunday gap aytishgandir, bezor bo‘lishgandir savollar bera boshlagan blogeru jurnalistlardan. Ammo ishni ommaga yoyar ekansan, oxirigacha turib berishni ham o‘ylash kerak.

Umuman, Akmal Saidovning ushbu dahshatli ishga aloqador nutqida alohida urg‘u berib blogerlarni qoralab o‘tib ketishi bir nechta savollar qoldirib ketyapti.

Blogerlar blogerlik qilsa maylimi, Akmal Saidov?

Nurbek Alimov
Ijtimoiy media blogeri