Navbahor Imomova: «Har kimga ta'zim qiladigan millat hech qachon qadr topmaydi»

Jurnalist Navbahor Imomova yozadi: Itni ham, bitni ham mehmonga chaqirib, tekin boqib, yana qo‘liga bebaho durdonalarni tutqazib, ta'zim qilib kutib olib, kuzatishdan faxrlanib yashaydigan xalq hech qachon izzatda bo‘lmaydi. 

Mana sizga nonko‘rlikning yana bir misoli. Nafaqat O‘zbekistonda, balki chetdagi vatandoshlar ham shunaqa – kim sizga kulib qarasa, boshingizga ko‘tarasiz; bizni tan olayapti, bizga lol qolayapti, degan kayfda do‘ppi-chopon, ikat-atlas kiydirasiz. 

Nafis sopol sovg‘alar, gilamlar, hunarmandchilik namunalari …

O‘zbekistonliklarga kim shunday ehtirom qiladi? Hatto qo‘shnilar ham bu qadar oshirib yubormaydi. 

Tadbirboz O‘zbekistonga, tasavvur qiling, har yili qancha odam tekinga kelib ketadi? 

Siz to‘laysiz (bevosita va bilvosita) o‘nlab forum va anjuman qatnashchilarining xarajatlarini. Karnay-surnay, milly kiyimda qishda qaltirab turadigan qiz va o‘g‘illar … 

Ok, qoyil qolishadi sizga, keyin nima? 

Dabdabali va qimmat an'analardan (illatlardan) voz kechish, amaliy yondashish vaqti yetib, o‘tib ham ketganini mana shu kallavaram Bezrukov sizga o‘ta farosatsiz shaklda eslatib turibdi.