Qovoq haqiga madhiya to‘qish boshlandi

«XXI asr» gazetasi O‘zbekiston prezidentining «o‘z vaqtida qabul qilingan» «Meva-sabzavot, kartoshka va poliz mahsulotlarini xarid qilish va ulardan foydalanish tizimini takomillashtirish chora-tadbirlari to‘g‘risida»gi qarori ahamiyatini tushuntirishga zo‘r bermoqda.

Gazetada O‘zbekistonda meva-sabzavot va poliz yetishtirish beqiyos foyda keltirishi ilgaridan ma'lum bo‘lsa-da, prezident mustaqillikning yigirma beshinchi yiliga kelibgina buni anglab yetgani sabablari ochiqlanmaydi.

Buning o‘rniga, gazeta fermer va tadbirkorlar «bu qarorning istiqbolli ahamiyatga ega ekanidan ruhlanayotgani»ni ta'kidlaydi.

Esingizda bo‘lsa, sal avvalroq bosh vazir barcha fermerlarni qovoq ekishga majburlash kampaniyasini boshlab yuborgani haqida xabarlar paydo bo‘lgandi. Hatto korxona va tashkilotlar ishchilari fermerlarga bu ishda «yordam berish»ga jo‘natilgandi.

Shuning uchun bo‘lsa kerak, maqolada qovoq yetishtirish masalasiga ham katta e'tibor qaratilgan. Jurnalistga intervyu bergan fermer esa qovoqning ahamiyatiyu foydasi haqida to‘lib-toshib gapiradi.

«…O‘zbekistonda yotishtirilgan qovoq jahon bozorida tobora xaridorgir bo‘lib bormoqda. Bir so‘z bilan aytganda, hujjat (ya'ni prezident qarori) qovoqni ham katta miqdorda eksport qilish imkonini beradi», deya xulosa qilinadi gazetada.

Eltuz.com