Har bolaga 25 kilo temir-tersak

Farg‘onalik M.ismli ayol 1-sinfda o‘qiydigan qizchasini maktabga jo‘natdiyu, Xalq ta'limi vazirligining “Ishonch telefoni”ga qo‘ng‘iroq qilish uchun qo‘liga telefon oldi.

“Yosh bolagayam 25 kilo temir-tersak deydimi?”, o‘ylandi u. Soatga qaradi. Endigina 7 dan 30 daqiqa o‘tibdi. Hali “Ishonch telefon”lari ish boshlashiga bir yarim soatdan mo‘lroq vaqt bor ekan. Ishlariga unnadi.

Ayolning jig‘ibiyron bo‘lishida jon bor. Bugun maktablarda metallom, makalatura, baklashka “operatsiya”lari qizg‘in davom etmoqda. Har uchchala narsani olib kelmagan o‘quvchilarga sinf va maktab rahbarlari tomonidan dakki berilmoqda, “ertaga maktabga kirgazmayman” deya ular qo‘rqitilmoqda.

Maktablarning birini sinf rahbari bilan aynan shu masalada gaplashdim.

-Sinfimda 40 nafar o‘quvchi o‘qiydi, – dedi muallima. 600 kilo metallom topshirishimiz kerak. Har bir o‘quvchiga 25 kg. metallom, 5 kilodan makalatura, 5 donada baklashka olib kelish topshirig‘ini berganman. Majburman. Mendan maktab rahbari talab qilmoqda.

Maktab rahbari bilan bog‘langanimda esa u 1200 nafar o‘quvchi o‘qiydigan maktab uchun “yuqoridagi”lar yetti yarim tonna metallom topshirish shartini qo‘yganligini aytib berdi.

“Yaxshiyam tushungan ota-onalar bor” dedi direktor quvonch bilan, bir ota-ona 1,5 (bir yarim tonna) temir olib kelib berdi va “Bolalarga aytmay qo‘yavering, ustoz, men yana qancha kerak bo‘lsa olib kelib beraman” dedi, deya xursand bo‘ldi.

O‘quvchilar olib borgan metallom, makalatura va baklashkalari uchun hech qanday haq olmaydi. Metallom, makalatura, baklashka olib bormagan o‘quvchilar esa sinfiga qarab 10 ming so‘mdan 15 minggacha pul berishlari majburiydir.

Nasima Davron qizi
Eltuz.com