Teatr ko‘chasida ro‘y bergan “o‘zbek fojeasi”

21 iyun kuni o‘shlik Rustamjon Turg‘unov ismli 33 yashar o‘zbek o‘zi bilan birga Fotixdagi arzon mehmonxona (Malabadi Beyazit Hotel)da yashagan to‘shakdoshi 44 yashar o‘zbekistonlik Gulchehra Mahamadjonovaning tomog‘iga pichoq tortti.

Dod-voy boshlanib mehmonxonaga politsiya kirib kelganida Rustamjon ayni pichoq bilan bilak tomirlarini kesib tashladi.

Istanbul politsiyasi tarqatgan habarga ko‘ra voqea joyiga zudlik bilan yetib kelgan tez ërdam mashinasi, qoniga belangan ikki o‘zbekni kasalxonaga yetkazgan.

Yarador juftlikning ahvoli og‘ir ekani ham aytilmoqda.

Eltuz.com muxbiri voqea sodir bo‘lgan mehmonxona hodimi bilan gaplashdi. Hodimning aytishicha hodisa soat kunduzgi uchlarda sodir bo‘lgan:

«Bularni oteldan chiqadigan vaqti kelgan edi. O‘zi soat 12 da hisob-kitob qilib ketishlari kerak edi. Chiqavermagach, xabar olay deb eshikni qoqdim. Eshik ochiq ekan ichkari kirdim. Qarasam hamma ëq qon. O‘rtada o‘zbek xotin qora-qonga belanib ëtibdi. Darxol politsiya chaqirdim, juda ko‘p politsiya keldi. Uchta mashinada kelishdi», – deydi suhbatdosh.

Istanbulning Teatr ko‘chasidagi mehmonxonasida sodir bo‘lgan voqea yuzasidan Fotih mavzesi politsiyasi surishtiruv olib bormoqda.

Rossiya, Qozog‘iston va Janubiy Koreya kabi mamlakatlarni to‘ldirgan o‘zbekistonlik mehnat muhojirlari bugungi kunda tirikchilik ilinjida Turkiya shaharlarini ham “ishg‘ol” qilmoqda.

Rossiya matbuotida ëritilaverib siyqasi chiqqan “jinoyatchi o‘zbek” mavzusi shu kunlarda turk matbuotiga ko‘chmoqda.

Eltuz.com