Buyuk Britaniya TIV: O‘zbekistonda inson huquqlari bilan bog‘liq vaziyat tashvishli

O‘zbekistonda inson huquqlari bilan bog‘liq vaziyat so‘nggi olti oy davomida o‘zgarishsiz qolgan, deyiladi hisobotda.

Mahkumlarga nisbatan g‘ayriinsoniy munosabat, din va fikr erkinligi, shuningdek, kattalar majburiy mehnati muammolari tashvishlidir.

Hisobotda xalqaro tashkilotlarning mamlakatda korruptsiya yuqori darajada ekani, hamda O‘zbekistonning zamonaviy qullar soni bo‘yicha eng ko‘p beshta davlat qatoriga kiritilgani yuzasidan xalqaro tashkilotlar ma'lumotlari keltiriladi.

Hisobot mualliflari O‘zbekistonda inson huquqlari bo‘yicha og‘ir vaziyat va xususan, inson huquqlari himoyachilarining ta'qib etilishlarini urg‘ulab, jumladan bunga misollar keltiradi.

Misol uchun, O‘ktam Pardaev, Inson huquqlari tashkilotining Jizzaxdagi vakilidan o‘ch olish maqsadida 2016 yilning yanvarida firibgarlik va poraxo‘rlikda ayblanib sudlanadi. Iyun oyida inson huquqlari himoyachisi G‘anixon Mamatxonovning qamoq muddati «jazo muassasalari ma'muriyatiga bo‘ysunmaslik» hukmi bilan tag‘in 3 yilga uzaytiriladi.

Joriy yilning yanvar oyida esa, o‘zbek hukumati «Akromiylar» harakati raxbari va 2005 yilgi Andijon qo‘zg‘oloni tashkilotchisi deb ataydigan Akram Yo‘ldoshevning o‘lgani ma'lum bo‘ldi.

Akram Yo‘ldoshev so‘nggi bir necha yil davomida o‘z qarindoshlari bilan uchrashish huquqidan mahrum, va qamoqda mutlaqo izolyatsiyada qolib kelayotgan edi. Qamoqda uning o‘limi haqiqiy sabablari ham noma'lum qoldi.

Hisobotda, shuningdek, muayyan diniy tashkilot doirasida deb atalmish «ekstremistik» faoliyati uchun 2016 yilning mayida yetti yilga qamalgan jizzaxlik fermerlar bilan bog‘liq Aramayis Avakyan ishi ham ta'riflanadi. Aramayis Avakian va u bilan birga sudlangan to‘rt nafar erkaklar tergov davomida qiynoqlarga tutilgani ochiqlanadi.

Avvalroq, Britaniya Tashqi ishlar vazirligi inson huquqlarining buzilishigi oid ishlarga aloqador shaxslarning Buyukbritaniyaga kiritilishini taqiqlash lozimligi haqida bayonot bergan edi.

Eltuz.com