Viloyat hokimi majlisida svet o‘chib qoldi

Farg‘ona viloyat hokimining tumanlarda o‘tkazayotgan majlislarda chiroq o‘chib qolib, majlis ahli lampa chiroq, qo‘l fonarlarini yoqishga majbur bo‘lishmoqda.

Tumanlarning hokimlarini birin-ketin almashtirish va xalq bilan muloqot qilish maqsadida majlislar o‘tkazayotgan viloyat hokimi Shuhrat G‘aniev tumanlarda energiya tanqisligini o‘z tanasida his qilishiga to‘g‘ri keldi.

Xalq bilan uchrashish uchun 14 dekabr kuni Buvayda tumaniga kelgan viloyat hokimi yarim soatdan ortiq chiroqsiz o‘tirdi.

«Bu birinchi marta bo‘layotgani yo‘q», – dedi G‘anievga hamroh bo‘lib yuradigan mulozimlardan biri Eltuz.com muxbiriga.

Uning so‘zlariga ko‘ra bundan ilgari, paxta paytida Oltiariq, Rishton, Quva, Bag‘dod, Beshariq tumanlarida ham majlislar ko‘pincha Xitoyda ishlab chiqarilgan lampa chiroqlar, qo‘l telefonlarining fonarlari yorug‘ida o‘tkazilgan.

Ayniqsa, kunlar sovishi bilan bu hol ko‘p takrorlanmoqda.

Marg‘ilon, Buvayda, Oltiariq, Quva, Dang‘ara tumanlarida o‘tgan faollar yig‘ilishida viloyat hokimi jami beshta hokimni almashtirdi.

Shuhrat G‘anievning o‘zi 2012 yilning dekabrida, Islom Karimov farmoni bilan Farg‘ona viloyati hokimligiga tayinlangan, undan ilgari viloyatning avvaligi hokimi Hamidjon Ne'matov ishdan bo‘shatilgan edi.

Nasima Davron qizi
Eltuz.com