Achchiq qalampirning achchiq qismati

Bu yil bahordagi yig‘ilishda fermerlarga achchiq qalampir ekish topshirildi.  Bunga O‘zbekiston Vazirlar Mahkamasining 2018 yil 27 yanvardagi qarori ijrosini ta'minlash asos qilib ko‘rsatildi.

Ba'zi fermerlar paysalga solib yurishdi. Men bo‘lsam “hokim baribir ektirmasdan qo‘ymaydi”, degan o‘y bilan o‘zim ishga kirishdim.

Toshkendagi achchiq qalampir yetishtirayotganlarning tajribasini o‘rgandim va ulardan urug‘lik sotib oladigan bo‘ldim.

Allaqayoqdandir paydo bo‘lgan dallollar viloyat hokimidan ruxsat olib fermerlarni urug‘lik bilan ta'minlashini aytdi.

Hokim himoyasi ostida fermerlarga bosim o‘tkazib, fermerlar bilan shartnoma tuza boshladi. Toshkentdagi tanish mutaxassislarga telefon qilib dallollar haqida so‘rasam, ulardan urug‘lik olmaslikni maslahat berdi.

Ularning o‘taketgan firibgar ekanini, urug‘lari tumsonav bo‘lib, umuman hosil tugmasligini aytdi. Xorijdan keltirilgan 1 kg eng sara qalampir urug‘i 500 000 so‘m bo‘laturib, dallollar menga bepusht qalampir urug‘ini uyalmay-netmay 1 mln. 100 000 so‘mga pullamoqchi.

Men ularning taklifini qayta-qayta rad etishimga qaramasdan, ular meni tinch qo‘yishmadi. Mayli, dedim oxiri, shartim shuki, qalampir hosilini ham o‘zlaringiz sotib olasizlar, dedim.

“Biz faqat urug‘ sotish bilan shug‘ullanamiz”, deyishdi ular. Keyin boshqacha taklif kiritdim. Pulning 25%ini oldindan, 50% ini urug‘ unib chiqqandan so‘ng, qolganini hosilni ko‘rib to‘lamoqchi ekanimni aytdim.

Ular esa hammasini oldindan to‘lashimizni talab qildi. Men ko‘nmadim. O‘zim urug‘ topib 1000 metr yerga qalampir ekib, hokimning zug‘umidan qutildim. O‘sha dallollardan urug‘ olgan fermerlarning hosilini kuzatdim. Shildiragan poya boru hosil yo‘q.

Meniki serhosil bo‘ldi. Endi uni so‘raydigan odam yo‘q. Shuncha qalampirni kimga terdiraman, kimga sotaman. Hozir hokimlar paxta bilan ovora. Paxta mavsumi tugagandan keyin taqsimotda ko‘rsatilgan ekinlarni birma-bir so‘roqlab boshlaydi.

Qalampir chirib ketsa ham ularning ishi yo‘q. Bankka falon million naqd pul topshirishni talab qiladilar. Qalampir uchun ham, boshqa ekinlar uchun ham qancha pul topshirishimizni hozir hech kim bilmaydi.

Xorazmlik fermer
Eltuz.com