Majburiy obuna to‘xtatilsa, qog‘oz gazetalar o‘ladi

O‘zbekistonda majburiy obunaning taqiqlanishi ko‘plab mahalliy gazeta va jurnallarning yopilishiga olib kelishi mumkin.

11 yanvar kuni «Normativ-huquqiy hujjatlar» portalida e'lon qilingan “O‘qituvchi maqomi to‘g‘risida”gi qonun loyihasi bandiga ko‘ra, endilikda o‘qituvchilarning «bosma nashrlarga majburan obuna bo‘lishini tashkil etish qonun bilan man etiladi».

«Moliyaviy ahvolimiz chatoq. Bu yil atigi 400 ta obuna bo‘ldi. Majburiy obuna yo‘q bo‘lib gazetalar yopilish arafasida», dedi «Eltuz» muxbiri bilan suhbatda o‘z ismini ochiqlashni istamagan Farg‘ona viloyati gazetalaridan birida ishlovchi xodim.

Gazeta xodimining so‘zlariga ko‘ra, shu paytgacha u ishlaydigan gazetaning doimiy obunachilari o‘qituvchilar bo‘lib kelishgan.

Uning tag‘in bildirishicha, majburiy obunaga yo‘l qo‘ymaslik haqida aytilayotgan bo‘lsa-da, mahalliy gazetalarning «yuqorida tankasi borlari ilinib olyapti».

«Masalan, «Vodiy gavhari» degan jurnal va gazeta bor. O‘shaning muharriri Andijon viloyati hokimining jiyani bo‘ladi. «Saodat», «Hurriyat», «Xalq so‘zi» kabi markaziy gazetalar qatori unga ham davlat tashkilotchilari ishchilariga majburiy obuna qildirildi», deydi gazeta xodimi.

Rassom Tuz
Eltuz.com