Shvetsiyada teraktga aloqadorlikda gumon qilingan yana bir o‘zbek qo‘lga olindi

Shvetsiyaning Ostersund shahrida 14 avgust kuni odamlarni mashinasiga bostirib terror akti uyushtirishga uringanlikda gumon qilingan 32 yashar o‘zbek qo‘lga olindi.

Bu haqda xabar bergan «Aftonbladet» (Aftonbladet) nashriga ko‘ra, u o‘zining shaxsiy shirkatiga rasmiylashtirilgan «Volvo» avtomobilida ko‘chaning gavjum qismida odamlarni bostirishga harakat qilgan.

Ekot shved radiosi bu shaxsning o‘zbekistonlik ekanini ochiqladi. U endilikda qotillik rejasiga tayyorgarlikda ayblanib, politsiyaga topshirilgan.

Shved nashrlari, shuningdek, voqea guvohlari shubhali harakatlar qilayotgan haydovchi haqida xabar berishgani, politsiya mashina beton bordyurga borib urilganidan keyin bu shaxsni qo‘lga olishga muvaffaq bo‘lgani, uning yonidan tergov versiyasiga aloqador dalillar chiqqanini yozmoqda.

«Eltuz» nashrining o‘z manbalari orqali o‘rganishicha, qo‘lga olingan shaxs Shvetsiyaning Yamtlend viloyati Foling (Föllinge) shahrida yashovchi 1983 yil tug‘ilgan Dilshod Usmonovdir.

Shved nashrlarining mamlakat xavfsizlik xizmati (SÄPO) dan iqtibos qilib bildirishlaricha, politsiyada Usmonovni terror aktiga aloqadorligini tasdiqlovchi jiddiy dalillar bor.

Biroq hozircha mazkur hodisa yuzasidan ish boshlagan shved politsiyasi va xavfsizlik xizmati tergovga va gumonlanuvchining shaxsiga oid ma'lumotlarni ochiqlamayapti.

Shu yilning yanvarida shved sudi «Islomiy davlat» (IShID terror tashkiloti)ni moliyalash va teraktlar tayyorlashda ayblangan olti nafar o‘zbek – Akromjon Ergashev, G‘ulom Tojiev , Farhod Toshmuhammedov, Shoahmad Mahmudov, Baxtiyor Umarov, qirg‘izistonlik Otabek Abdullaev ustidan hukm chiqargan edi.

Ularning ikki nafari ayni Usmonov yashayotgan Shvetsiyaning Octersund shahridan ekanini «Eltuz» nashri ochiqlagandi.

Jumladan, o‘zbekistonliklar Stokgolm sudi qarori bilan «Islomiy davlat»ni moliyalash va Yevropa davlatlarida keng miqyosda terror aktlariga tayyorgarlik ko‘rishda ayblanib, uzoq yillik qamoq jazosiga hukm qilingan edi.

Shved nashrlarining xavfsizlik xizmatlaridan iqtibos keltirib bildirishicha, Usmonovning boshqa bir o‘zbekistonlik terrorchi Rahmat Oqilov bilan ham aloqalari bo‘lgan.

2017 yilning 7 aprel kuni Rahmat Oqilov yuk mashinasida Stokgolm markaziy ko‘chasi Drottninggatanda bir necha odamni bosib, terakt sodir etgan. To‘rt kishi, jumladan, 11 yashar qizaloq halok bo‘lgan, 15 odam jarohatlangan edi.

Eltuz.com