Nyu-Yorkdan nazar: Xalqni elektr va gaz bilan ta'minlash yechib bo‘lmas muammomi?

Qishloq xo‘jaligi mutaxassisi, 70 yoshli Ismoil Ospanov «Eltuz» orqali o‘z turkum chiqishlarini davom ettirib, navbatdagi videosida O‘zbekistonda qish mavsumi, elektr va gaz tanqisligi haqida gapiradi. Buni u hukumatning e'tiborsizligi oqibati, deya ataydi.

«Nima uchun aholisi zich, shaharlari bir-biriga yaqin, infratuzilmasi yaxshi rivojlangan davlat qashshoqlik darajasigacha olib kelindi? Nima keragi bor edi prezident iqtidorga kelishi bilan o‘ziga uchta qarorgoh qurishining? Bor edi-ku qarorgoh – uni muzey qilish shartmidi? Yoki anovi «siti-miti»lar? Dunyoda eng qimmat samolyot! Kerakmidi», deya savollar qo‘yadi Ismoil Ospanov.

Ospanov o‘z chiqishida hukumatning tabiiy gaz konlarini o‘zlashtirishdagi siyosatini ham tanqid qildi. Tabiiy gaz eksportini kamaytirish, aholiga yetkazib berish hajmini ko‘paytirish kerakligini aytdi.

Uning fikricha, Rossiya bilan AES qurish shartnomasi ham iqtisodiy zararli g‘oya.

Buning o‘rniga mamlakatni elektr energiyasi bilan ta'minlash uchun shamol va quyosh energiyasi bilan ishlaydigan zamonaviy elektrostantsiyalar qurilishi kerak.

Bundan ilgari “Eltuz” kanalida chop etilgan bir qancha videochiqishlarida sobiq hokim Ismoil Ospanov prezidentning kadrlar siyosati, dehqonlar huquqlarining kamsitilishi, klaster tizimidagi korruptsiya holatlarini tanqid ostiga olgan edi.

Eltuz.com