Bizdan Jiz: Shvetsiyalik o‘zbeklarning Abror Aliyga javobi

Shvetsiyadagi ulfatlar taklifi bilan yakshanba kungi shashlikxo‘rlik o‘z o‘zidan siyosiy mavzuga ko‘chdi. Va men mezbonlar izni bilan suxbatni Eltuz kanali muxlislari bilan baham ko‘rish uchun videoga olishga kirishdim.

Mavzuga O‘zbekistonning Shvetsiyadagi elchixonasi oldidagi norozilik piketi va bu haqda o‘zbekistonlik diniy mutaassib Abror Muxtor Aliyning shved hukumati va o‘zbek muxojirlari sha'niga yog‘dirgan haqoratli gaplari sabab bo‘ldi. 

Shvetsiyadagi diniy faollar O‘zbekistonda turmada qolayotgan 22 nafar mahkum ozodligini talab qilib o‘tgan hafta O‘zbekistonning Stokgolmdagi elchixonasi oldida norozilik piketi uyushtirishgan. Abror Muxtor Aliy bunga munosabat bildirib:

«Musulmonlarning Shvetsiya kabi kofirlar davlatidan yordam so‘rashga haqqi yo‘q!» degan edi. Xolbuki shvetsiyadagi norozi o‘zbeklar O‘zbekiston elchixonasiga murojaat qilishgan. Suhbatdoshlarim Muxtor Aliy iddaolaridagi shu va boshqa ziddiyatlarga e'tibor qaratishdi.   

Shashlik atrofidagi suxbat asnosida Shvetsiyadagi o‘zbek faoli Do‘stnazar Xudoynazarov siyosiy kulinariyaga asoslangan «Bizdan jiz» ko‘rsatuvini  kengaytirilgan shaklda davom ettirishni taklif qildi.   

Shvetsiyaning serquyosh, bag‘ri keng osmoni haqida gapimiz tugamay yomg‘ir quyib berdi. Shu paytgacha yig‘ib qo‘yilgan soyabonni yoyishga to‘g‘ri keldi.

Shashlikka ancha to‘yib qoldik. Ammo gapimiz tushamadi. Agar shunday suhbatlar Eltuz muxlislariga yoqsa va Shvetsiyalik ulfatlarimda ularning fikrini qog‘ozga o‘ramay uzatishga e'tiroz bo‘lmasa bunday ko‘rsatuvlarni kelgusida davom ettirishimni aytib xayrlashdim.  Videolavhamiz bilan tanishing.  

Qudrat Bobojon,

Eltuz muharriri