O‘zLiDeP xalqning qancha pulini “tuya” qilgan?

“XXI asr” gazetasi O‘zbekiston liberal-demokratik partiyasi –O‘zLiDePning 2015 yilgi byudjeti ijrosi va 2016 yilgi byudjetning asosiy ko‘rsatkichlari to‘g‘risidagi axborotni e'lon qildi.

Ma'lum bo‘lishicha, o‘tgan yili partiyaning hisob raqamlariga qariyb 18 milliard 273 million so‘m mablag‘ kelib tushgan. Bu mablag‘ning 15 milliard 513 million so‘mdan ortig‘i davlat byudjetidan ajratilgan. Partiya homiylardan bor-yo‘g‘i 3 million 276 ming so‘m pul olgan.

Shuningdek, O‘zbekiston prezidenti sayloviga tayyorgarlik ko‘rish va uni o‘tkazish uchun partiya hisobiga davlat byudjetidan qariyb 842 million so‘m berilgan. Bu mablag‘ning 411 million 337 ming so‘mi sarflangan, qolgani davlatga qaytarilgan.

Ko‘rinib turibdiki, o‘zini tadbirkorlar va ishbilarmonlar harakati deb biladigan bu partiyaga o‘z elektorati negadir pul berishni istamaydi. Partiyaning deyarli barcha xarajatlarini davlat ko‘taradi. Balki uning hukumat aytgan maqomga yo‘rg‘alashining asl sababi shundadir?!

Darvoqe, axborotda aytilishicha, joriy yilda partiya xalqning qariyb 25 milliard so‘m pulini “tuya” qilishni ko‘zlamoqda.

Eltuz.com