Mahalla oqsoqoli – avval tanlanadi, keyin saylanadi

«Xalq so‘zi» gazetasining yozishicha, Toshkent viloyati bo‘yicha 1158 nafar mahalla fuqarolar yig‘ini raisi va ularning 11 mingdan ziyod maslahatchilarini saylash rejalashtirilgan bo‘lib, hozirgacha 697 nafar rais va ularning 7 ming 100 nafarga yaqin maslahatchisi tanlab olingan.

Ha, aynan saylash uchun tanlab olingan. Garchi bu tadbirning nomi saylov bo‘lsa-da, O‘zbekiston qonunchiligi aynan shunday mexanizmni ko‘zda tutadi. Nomzodlar avval saylovni o‘tkazishga ko‘maklashuvchi komissiyalar tomonidan tanlab olinadi.

Bundan ko‘rinib turibdiki, komissiya (davlat hokimiyati vakillari deb tushunilsa, xato bo‘lmaydi) tanlab olmagan, ya'ni «yuqori»ning tasdig‘idan o‘tmagan biror zot raislikka «saylana» olmaydi.

Eng e'tiborlisi, xuddi shu mexanizmni «Xalq so‘zi» «tenglik, muqobillik va oshkoralik tamoyillari ustuvor» deb ta'riflaydi.

Yana bir jihati, nomzodlarning dasturlari ham bor. Bu dasturlarda «mahallada kichik biznes va sportni rivojlantirish, xizmat ko‘rsatish va servis sohasini yaxshilash, kommunal xizmatlar sifatini oshirish» kabilar qamrab olingan.

Yuqoridagi ishlarni bugun davlatning o‘zi ham eplab amalga oshira olmayotgan bir paytda nomzodlarning bunday «jasorati» nekbinlikdan ko‘ra ko‘proq istehzoga sabab bo‘ladi.

Eltuz.com