Mijozlar telefon raqami egalariga qaram bo‘lishadimi?

O‘zbekiston matbuoti, ilk bor mijozlarning mobil operatorlarga qaramligi masalasini ko‘tardi.

O‘zbekistonda mobil aloqaning qimmatligi, operatorlar xizmati sifati pastligidan shikoyat qilmagan odam yo‘q, biroq bu haqda gazetalarda yozilmasdi.

Hususan «Xabar» gazetasida (07.04) e'lon qilingan «Raqamni almashtirish mumkinmi yoxud «mobil qaramlik»dan qutulish haqida» sarlavhali maqolada «bir operator xizmatlaridan foydalanib kelayotgan mijoz uchun o‘z operatorini boshqasiga almashtirish ma'lum qiyinchiliklarni yuzaga keltirayotgani» ta'kidlanadi.

«Respublikamizda mobil aloqa operatorlari o‘rtasida mobil telefon raqamlari prefikslarining o‘zaro bo‘linganligi sabab mijoz o‘zi o‘rgangan, o‘zining ish faoliyati yoki boshqa sabablarga ko‘ra qulay bo‘lgan telefon raqamini boshqasiga almashtirishi zarurligi katta noqulaylik tug‘diradi», deyiladi maqolada.

To‘g‘ri, matbuotda yoritilishidan avval «mobil qaramlik» muammosi rasmiy idora – Aloqa, axborotlashtirish va telekommunikatsiya texnologiyalari sohasida nazorat bo‘yicha davlat inspektsiyasi vakili tomonidan ko‘tarilgani aytiladi.

Muallif mobil qaramlikdan qutulishning bir yo‘li «telefon raqamini saqlagan holda mobil aloqa operatorini almashtirish imkoniyati yaratilishi» ekanini bildiradi.

Uning yozishicha, bunday imkoniyatning yaratilishi mobil aloqa operatorlarini o‘z xizmati sifatini yaxshilashga undaydi, bundan esa faqat mijozlar manfaatdor.

Bahodir Sharif
O‘zbekistonlik gazetxon tahallusi
Eltuz.com