70 $ ming pora bilan ushlangan amaldor nega yengil jazo oldi?

O‘zbekistonda poraxo‘rlikka qarshi kurash davlat siyosati darajasida e'lon qilingan. Lekin ayrim jinoyat ishlari borki, oradan yillar o‘tgan bo‘lsa-da, ular bo‘yicha chiqarilgan hukmlar jamoatchilikda hanuz savol uyg‘otadi. 2022 yilda Xorazm viloyatida ko‘rilgan bir poraxo‘rlik ishi shular jumlasidan.

2022 yil oktyabrida Urganch tumani hokimining birinchi o‘rinbosari lavozimida ishlab kelgan Rustam Achilov bir tadbirkorga 100 gektar yer maydoni ajratib berishni va'da qilib, 70 ming AQSh dollari miqdorida pora olayotgan vaqtda Davlat xavfsizlik xizmati xodimlari tomonidan ushlangan.

Mazkur ish Ellikqal'a tuman sudida ko‘rib chiqilgan. Sud qarori bilan Achilovga nisbatan Jinoyat kodeksining 57-moddasi qo‘llanilib, ozodlikdan mahrum qilish o‘rniga axloq tuzatish ishlari jazosi tayinlangan. 70 ming dollar pora uchun bunday yengil jazo tayinlanishi o‘sha paytda ham ko‘plab e'tirozlarga sabab bo‘lgan.

E'tiborli jihati shundaki, Rustam Achilov Xorazm viloyati sudining sobiq raisi Bahodir Polvonovga xotin tomondan qarindosh hisoblanadi. Achilov Rustamboy – chechamizning amakisi. Bu holat sud qarorining xolisligiga ta'sir qilgan-qilmagani haqida ochiq javob berilmagan.

Solishtirish uchun yana bir holatga nazar tashlaylik. Tuproqqal'a tumanida Ekologiya bo‘limi boshlig‘i va bio-inspektor atigi 835 ming so‘m pora bilan qo‘lga tushgan. Ushbu ish bo‘yicha sud ularga nisbatan 5 yil muddatga ozodlikdan mahrum qilish jazosini tayinlagan. Pora miqdori o‘nlab, hatto yuzlab barobar kam bo‘lsa-da, jazo keskinroq bo‘lgan.

Bu yerda tabiiy savol tug‘iladi: nega katta miqdorda pora olgan mansabdor yengil jazo bilan qutulib ketgan, ancha kam mablag‘ uchun esa qattiq hukm chiqarilgan?

Jamoatchilik orasida Rustam Achilov haqida turli gap-so‘zlar yuradi. Urganch shahridagi «Dunyo» va «Saltanat» to‘yxonalari, katta hovli-joylar aynan unga tegishli ekani aytiladi. Shunday bo‘lsa-da, u bir necha bor tilga olinganiga qaramay, og‘ir jazodan qochib qolgani haqida qarashlar mavjud.

Adolatli jamiyatda jazo jinoyatga mutanosib bo‘lishi shart. Bu – huquqiy davlatning asosiy mezonlaridan biri. Lekin ushbu holatda jamiyat orasida qadimdan aytiladigan bir gap yana o‘z tasdig‘ini topgandek: poraxo‘r jazodan qutulish uchun ko‘proq pora olishi kerak.