O‘zbekistonda odamsimon robotlar ishlab chiqariladi

O‘zbekiston va Janubiy Koreya hamkorligida  mamlakatda gumanoid (odamsimon) robotlar ishlab chiqarish yo‘lga qoyilishi mumkin.

Ma'lumotlarga ko‘ra, O‘zbekiston-Koreya biznes davra suhbati davomida vazirlik vakillari Janubiy Koreyaning ROBOTIS kompaniyasi vakillari bilan birgalikda tegishli kelishuvni imzoladi. Qayd etilishicha, xorijiy kompaniya robototexnika sohasidagi yirik o‘yinchi bo‘lib, o‘zining gumanoid va ta'lim robotlari, shuningdek, intellektual aktuatorlari bilan mashhur.

Hujjat O‘zbekistonda gumanoid robotlar ishlab chiqarishni yo‘lga qo‘yish, texnologik va ishlab chiqarish bazasini yaratish, yangi soha uchun malakali mutaxassislarni tayyorlashni nazarda tutadi. Idoraning ta'kidlashicha, ROBOTISning robotlarni yaratish va tijoratlashtirish bo‘yicha ko‘p yillik tajribasi O‘zbekiston uchun o‘z yuqori texnologiyalar sanoatini jadal rivojlantirish imkoniyatini ochadi.

Hamkorlik memorandumi iqtisodiy sheriklikni chuqurlashtirish va mamlakatning innovatsiyalar sohasidagi mavqeini mustahkamlashda muhim qadam bo‘lishi kutilmoqda. 

Ushbu robotlar inson o‘rniga jismoniy ishlarni qila oladi. Yuk tashiydi, buyurtma xizmatlarini  bajaradi. Inson omili borishi mumkin bo‘lmagan, portlash xavfi bor joylarga boradi. Qutqaruv ishlari va boshqa xavfli vazifalarni bajaradi. Inson bilan tabiiy muloqot qila oladi. Xizmat ko‘rsatadi, yo‘l ko‘rsatadi, bino yoki majmualar bilan gid singari tanishtiradi.

Avvalroq O‘zbekistonda xalqaro raqamli texnologiyalar markazi paydo bo‘lishi haqida xabar berilgandi. Tashkilot sohaga keng ko‘lamli investitsiyalarni jalb qilish bilan shug‘ullanishni maqsad qilgan.