Chala qurilgan uy, isrof bo‘layotgan suv va ko‘mib yuborilgan ariq – EP127

Eltuz portaliga kelgan navbatdagi 5 ta shikoyat maktubini o‘qib eshittiramiz. Ular O‘zbekistonning Buxoro, Toshkent va Andijon viloyatlaridan kelgan. Dastlabki murojaatni Buxorolik ko‘zi ojiz vatandoshimiz yo‘llagan. U  chala xolda topshirilgan turar joy uyidagi noqulayliklar haqida viloyat hokimiga videomurojaat tayyorlagan.  

Keyingi murojaat Toshkent viloyatining Bo‘ka tumanidan. Videoda ichimlik suvi ko‘chaga oqib isrof bo‘layotgani aks etgan.

«Assalomu alaykum eltuz! Iltimos tegishli ma'sullarga yetib borsin.

 Toshkent viloyati, Bo‘ka tumanidagi holat. Shundoqqina Suvoqava Davlat Unitar Korxonasining burni ostida joylashgan ko‘cha boshidan oxirigacha suv toshib yotibdi. Achinarli tarafi 1 haftadan beri tonnalab suv uvol bo‘layotgan bir vaqtda qancha insonlar bir tomchi suvga zor.

Baraka topgur SUVOQAVAda biror ko‘zi ochiq inson yo‘qmi? Trubani yamay olmasang o‘chirib qo‘y, Uylarni zax olib ketdiyu.» deya yozmoqda Bo‘ka turg‘uni.

Navbatdagi maktub Andijonning Bo‘ston tumanidan. Tumanning ”Obod” mahallasidagi fuqarolar havfli, qo‘l bola simyog‘ochlar, chang va loy bosgan ko‘cha haqida yozishmoqda, ular yillar davomida ayni hududda yashab kelishmoqda.

”Bizning mahallaga tuman hokimi bir necha bor kelib, simyog‘och va yo‘llarimizni ko‘rgan. Lekin muammoni hal qilgani yo‘q. Svet juda past ishlaydi. Suv qaynatish uchun soatlab vaqt ketadi. Yo‘limiz ham loy, chang bo‘lib ketadi. Ko‘chamizga ariq ham kelmagan. Mevalarni sug‘orishda qiynalyapmiz. Bizga ariq ham kerak” deydi murojaatchi.

Ko‘rsatilgan muammo bo‘yicha tuman hokimligi va tegishli tashkilotlardan ijobiy yechim kutib qolamiz.

Keyingi maktub Buxoroning Olot tumanidan. Videoda navbatdagi simyog‘och aks etgan. U Nurobod mahallasida joylashgan.

Va so‘nggi maktub Toshkent shahrining Sergeli tumanidan.

«Assalomu alaykum, Toshkent shahri, Sergeli tumani, Sputnik 16A dagi holat.

Ariq o‘tkazilgan, lekin «Xushnud» mahallaga kirishdagi ariq qum bilan berkitib tashlangan. Suv bechora qaerdan oqib o‘tishni bilmay sarson. Bu ko‘r ko‘rona qilinib ketgan ishlar» deya izohlaydi poytaxt ko‘chasidan o‘tgan ariq ahvoli aks etgan videoni toshkentlik Eltuz obunachisi.

Va bu sizning e'tiboringizga bugun havola etganimiz beshta murojaatning so‘nggisi edi.

Ko‘rsatuvimizga kelayotgan izohlarda ko‘pincha biz bilan qanday bog‘lanish. Qanday qilib bizga murojaat qilish mumkinligi to‘g‘risida so‘rashadi. Bilmaganlar uchun yana bir bor eslatamiz. eltuz portali interaktiv tarzda telegram kanalida alohida sahifa shaklida ochilgan. Murojaatlar uchun u erga maxsus bot ham o‘rnatilgan. Eltuz kelayotgan shikoyatlar, videomurojaatlar, takliflar va ularga yozilgan javoblarni ham e'tiboringizga taqdim etishga intiladi. Kun davomida biz bilan qoling. Kanallarimizga obuna bo‘ling.