Qish kirmay muzlab qolgan tibbiyot majmuasi

Namangan viloyatining Chortoq tumani tibbiyot birlashmasi xodimlari Eltuz nashriga yo‘llagan maktubda muassasa xonalarining sovuqdan muzlab qolganligi, bemorlar va tibbiyot xodimlari bundan og‘ir ahvolda qolayotganini ma'lum qilishdi.

Tibbiyot xodimlarining aytishicha, hali qish to‘liq kirib ulgurmasidanoq kasalxona binolarida isitish tizimi ishlamayapti, bu esa bemorlarning davolanishiga va xodimlarning mehnatiga jiddiy xavf solmoqda.

Murojaat mualliflarining yozishicha, bo‘limda bemorlar soni ko‘p, ammo hamma «ustki kiyimlarda, qalin kurtka-paltolarda» yurishga majbur. Ahvol shu darajaga yetganki, tibbiyot xodimlari o‘z yonidan pul yig‘ib, kasallar yotadigan palatalarga elektr isitgichlar sotib olgan.

«Bu ham xavfli narsa, lekin ilojimiz yo‘q. Bemorlar bunday sovuqda tuzalolmaydi. Muolajalarda qiynalayapmiz,» — deyiladi maktubda.

Shikoyatda tuman tibbiyot birlashmasi bosh vrachi Mahmudov va sog‘liqni saqlash boshqarmasi rahbariyati mansabini suiiste'mol qilayotgani aytiladi. Xodimlarning fikricha, kasalxonaga ancha miqdorda ko‘mir ajratilgan bo‘lsa-da, «hamma bo‘limlar sovuq».

Murojaatda bosh vrachning har ikki gapining birida DXXdagi tanishlarini ro‘kach qilishi, rahbarlik bilan tilini bir qilib olgani ta'kidlanadi.

Shuningdek, shikoyat mualliflari tibbiyot birlashmasi «tajriba-sinovga tushdi» deya ajratilgan katta mablag‘lar bosh vrach va boshqarma boshlig‘i tomonidan o‘zlashtirilganini gumon qilmoqda. Ularning ta'kidlashicha, rahbariyat elektron tizimlardagi (DMYeD) ishni bajarishni talab qilguncha, avvalo tibbiyot muassasasida «issiqlikni joyiga qo‘yib qo‘yishi» lozim.

«Tuman hokimi kamerachi bilan keladi, nomiga issiqlik kotyoli yonida rasmga tushib ketadi – g‘irt maynavozchilik,» — deyiladi maktubda.

Chortoq tumani tibbiyot xodimlari Sog‘liqni saqlash vazirligidan ushbu murojaatga bee'tibor bo‘lmaslikni va tibbiyot majmuasidagi muzdek sharoitlarni bartaraf etish bo‘yicha tezkor choralar ko‘rishni iltimos qilmoqdalar.