«Ura! Kollejlar yopiladi, 10-sinfga qaytamiz…»

Prezident Mirziyoevning maktablarni 11 yillik tizimga qaytarish, buning uchun kollejlarni yopish taklifi O‘zbekistondagi ko‘pchilik tomonidan olqishlanmoqda.

18 iyun kuni Xalq ta'limi vazirligi o‘tkazgan so‘rovnoma natijalariga ishonadigan bo‘lsak, 83 foiz 9-sinf bitiruvchilari va ota onalar bu taklifni qo‘llab quvvatlagan.

Maktab direktorlari ishtirokida 17 iyun kuni Toshkentda o‘tgan majlisda Bosh vazir Abdulla Aripov 2017 yildan boshlab Toshkentning har bir tumanida to‘rttadan 10 va 11 sinflar ochilishini aytdi.

11-yillik maktablarga o‘tish tarafdori bo‘lgan aksariyat ota-onalar kollejlardagi o‘qishning sifatsizligidan norozi ekanliklarini bildirishadi.

Biroq, yangi maktablar o‘qituvchilarning oyliklari va sharoitlarini saqlagan holda, ta'lim darajasini yaxshilashga yordam beradimi?

Bu haqda kun.uz nashrida maqola chop etgan Tursunali Akbarov, 11 yillik tizimga o‘tishda talay muammolar borligini aytadi.

Kvotalarning kamligi bois, har yili bor yo‘g‘i 10 % yoshlar Oliy o‘quv yurtlariga qabul qilinishi mumkin. Har yili maktabni bitiradigan 90 foiz yoshlar endi qaerga boradi? Kasb hunarsiz va oliy ma'lumotsiz kim ularni ishga oladi?

Londonda yashayotgan tahlilchi Alisher Ilhomov, bu – yurt iqtisodiyotini o‘rta darajali (oliy ta'lim olishlari shart bo‘lmagan) mutaxassislar bilan ta'minlash bo‘yicha Karimov rejalarining mutlaq barbod bo‘lganini anglatadi, deya hisoblaydi.

«Real iqtisodiyot talabi bo‘lmasa, bu mutaxassislarning nima keragi bor… O‘rta ta'lim tizimidan voz kechish qarori, chetdan qaraganda, iqtisodiyotning cho‘kib qolganidan dalolatdir.

G‘arbda va umuman ilgari Sovetlar davrida, unisi ham, bunisi ham – istasang maktabda o‘qishni davom ettirish va o‘rta maxsus ta'lim olish taklif etilgan. Ayni tizim – apprentice zamirida Germaniya iqtisodiyotidagi yutuqlar siri yashiringanki, bu tajribani boshqa davlatlar ham qo‘llamoqda.

Biroq faqat O‘zbekiston bundan mustasno“.

Rassom Tuz
Eltuz.com

• P.S: Maqola e'lon qilingach, 10-11-sinflar ochilishi munosabati bilan Toshkentda 26 ta kasb hunar kollejlari va akademik litseylar yopilishi ma'lum bo‘ldi. Uznews.uz cayti poytaxtda yopilishi kerak bo‘lgan o‘quv muassasalari ro‘yhatini e'lon qildi.