Mirziëev O‘zbekistoni saviyasiz haykallar poligoniga aylanmoqda

«Karimov davrida deyarli ishsiz qolgan o‘zbek haykaltaroshlarining qo‘li-qo‘liga tegmayapti», deydi Urganchdan kelib Toshkentda ishlayotgan haykaltarosh «Eltuz» muxbiriga. Uning aytishicha, shu kunlarda “ikki kommunist” – Karimov va Rashidovning haykal va byustlariga talab katta.

«To‘g‘risini aytsam, Karimov va Rashidovning Toshkent va Jizzaxda o‘rnatilgan haykallarini rassomlik institutining 3-kurs talabasi namoyishga qo‘ysa, o‘qituvchi urishib-urishib zo‘rg‘a 3 baho qo‘yib bergan bo‘lardi. Proportsiya, vizual estetika, monumental liniya kabi elementar qoidalarga rioya qilinmagan bu haykallarda», deydi haykaltarosh.

Londondagi Sharqshunoslik va Afrika tadqiqotlari markazining O‘zbekiston bo‘yicha tahlilchisi Alisher Ilhomov o‘zbek haykaltaroshlarining saviyasiz haykal yasash tezligidan hayratini izhor qiladi.

«O‘zbekiston o‘tmishdagi korruptsiyalashgan amaldorlar haykalini tiklash bo‘yicha rekord o‘rnatdi, bu mamlakat kelajagi ustiga chiziq tortish demakdir. Bu sobiq o‘g‘rilarning hozirgi o‘g‘ri hukumat tarafidan tashkil qilinaëtgan yubileylari xalq uchun tsunamidan ham battar baxtsiz hodisa bo‘lmoqda. Ijtimoiy infratuzilma butkul izdan chiqqan bu davrda o‘zbek aëllari tug‘may turgani ma'qulmi? Ko‘richak va infarkt kabi kasalliklarga chalinganlar narigi dunëda davo topsinmi? Xullas, oddiy odam, ya'ni sizning haëtingiz mavjud hukumat uchun bir tiyin», deb ëzadi o‘z sahifasida A.Ilhomov.

Rassom TUZ
Eltuz.com