Islom Karimov bobosining 80 yillik yubileyida Britaniyadan boshpana so‘radi

O‘zbekistonni 27 yil boshqargan va 2016 yilda o‘lgan Islom Karimovning nabirasi Buyuk Britaniya hukumatidan siyosiy boshpana so‘radi.

Bu haqida Bi-bi-si nabira Karimovning Londondagi advokatlariga tayanib ma'lum qildi.

Kichik Islom Karimovning Britaniyadan boshpana so‘ragani uning bobosi Islom Karimovning 80 yillik yubileyiga to‘g‘ri keldi.

Islom Karimovning to‘ng‘ich nabirasi O‘zbekistonda onasi Gulnora Karimovaga qarshi jinoyat ishi ochilib, u uy qamog‘iga olinganidan beri Britaniyadan o‘z yurtiga qaytgani yo‘q va shu yerda yashab keladi.

O‘tgan yil iyulda O‘zbekiston Bosh prokuraturasi Gulnora Karimova 2015 yilda soliq to‘lashdan bosh tortish aybi bilan 5 yilga ozodlikdan mahrum qilinganini bildirgandi.

Prokuratura, shuningdek, unga qarshi olib borilayotgan ikkinchi jinoyat ishiga ko‘ra, Gulnora Karimova qariyb 2 milliardlik dollarlik xorijiy valyutani yashirishda gumonlanayotgani va u boshqargan guruhning 1,5 milliard dollarga yaqin mablag‘i 12 ta xorijiy davlatda aniqlashtirilganini ma'lum qilgan edi.

Shu kunlarda Mirziëev hukumati Islom Karimov tavalludining 80 yilligini keng nishonlamoqda. Rasmiy matbuotda Islom Karimov bilan bog‘liq esdaliklar ëzish urchigan. Bu esdaliklarda na Gulnora Karimova va uning farzandlari eslanmaydi.

Rassom Kirpi chizgan rasmda kichik Islom Karimov «O‘lgan bobomning 80 yillik to‘yida menga sadaqa qilinglar», deb turgan tarzda aks ettirilgan.

Rassom Kirpi
Eltuz.com