«O‘zbekiston havo yo‘llari»ning egasi almashadi

O‘zbekistonning davlat monopolisti bo‘lgan «O‘zbekiston havo yo‘llari» aviakompaniyasi xususiylashtiriladi. Bu haqda Xalqaro valyuta jamg‘armasi maslahatchisi Sardor Sa'dullaev 9 may kuni «Reyter» agentligiga intervyusida bildirdi.

«Bizda bitta monopol «O‘zbekiston havo yo‘llari» aviashirkati bor, biroq biz sohani isloh qilish, davlat aviashirkatini daxlsiz shirkatlar ro‘yxatidan chiqarish borasida Jahon banki bilan hamkorlik qilyapmiz», dedi Sa'dullaev.

Aviashirkatning davlatga zarar keltirayotgani uchun ham xususiylashtirilayotgani iddao qilinmoqda.

«Misol uchun, bir yil oldin ochilgan Dushanbe-Toshkent reysidan O‘zbekiston faqat zarar ko‘rmoqda. Bu haqda kompaniyaning o‘zi xabar qildi. Har bir parvozdan kompaniya 5-8 million ziyon ko‘rmoqda ekan», dedi Bi-Bi-Si jurnalisti Ibrat Cafo 11 may kungi chiqishida «O‘zbekiston havo yo‘llari» xabaridan iqtibos keltirib.

Shuningdek, u «O‘zbekiston havo yo‘llari» moliyaviy hisobotlarini chop qilmasligi bois, uning iqtisodiy ma'lumotlarini bilish qiyinligini ham aytdi.

Kuzatuvchilar fikricha, yirik shirkatlarning xususiylashtirilishi, korruptsiyaga botgan O‘zbekistonda hukmron shaxslar daromadining jamiyatdan yopiqligi bois, yangi oligarxlarning paydo bo‘lishiga olib kelishi mumkin.

Rassom Tuz «O‘zbekiston havo yo‘llari»ni o‘zlashtirayotgan yangi o‘zbek boyi rasmini chizdi.

Rassom Tuz
Eltuz.com