BTRlardan yangragan qo‘shiq munozaraga sabab bo‘ldi

Joriy yilning apreli boshidan Toshkent ko‘chalarida BTRlarda yurib, karantin bois karnaylar orqali aholini uyda qolishga da'vat etish boshlandi.

Biroq tarmoqda BTRlardan ham ko‘ra, karnaydan yangrayotgan xonanda Rashid Xoliqovning «Ey, aziz yurtim!» qo‘shig‘idan norozilik ko‘zga tashlandi.

Feysbukdagi «Xalq bilan muloqot» guruhidagi ayni mavzu ostiga qisqa vaqt ichida 500 dan ziyod yozildi.

Kimdir BTRlardan umuman qo‘shiq qo‘ymaslikni, kimdir harbiy vertolyotlarga karnaylar o‘rnatib, bu ishni rivojlantirishni taklif qildi.

«Poytaxt ko‘chalarida harbiy texnikalar b-n xalqni karantin tartibiga rioya qilishga chorlab yurganlarga ming rahmat. Ammo BTR ichidan yangrayotgan Rashid Xoliqovning » Ey, aziz yurtim» qo‘shig‘i ko‘pchilik qatorida maniyam ensamni qotiryayotganini yashirmayman. Undan ko‘ra Sevara Nazarxonning karantindagi jasorati namunasi o‘laroq, » Ulug‘imsan, Vatanim» qo‘shig‘i yaxshi emasmi?» deb yozdi feysbuk yuzeri Gulshoda Qurbonova.

Uning tag‘in yozishicha, «Yulduz Usmonovaning «Hech kimga bermaymiz seni O‘zbekiston!» qo‘shig‘iniyam ne v tema».

Ulug‘bek ismli yuzer «Nastarin guli mayda…»ni qo‘yishni taklif qildi.

Bir zumda Rashid Xoliqov va Sevara Nazarxon ishqibozlari tarafma-taraf bo‘lishdi. Kimgadir Rashid Xoliqovning pishirgan qozon kabobi yoqmadi, kimgadir Sevaraning ovozi…

Munozara guruh ma'murining izohlarni to‘xtatish talabigacha davom etdi.

Eltuz.com