Qoraqalpog‘istondagi avtobus sirlari

Qoraqalpog‘istonda prezident xalq uchun ajratib bergan 100 ta “Isuzu” avtobusining taqdiri katta muammoga ishora qilyapti.

2018 va 2019 yillarda Prezident tashrifi chog‘ida xalqqa xizmat qilish uchun ajratilgan avtobuslar Ipoteka bank krediti asosida olingan, to‘lovning asosiy qismi “Shimbay Avtotrans” zimmasiga yuklangan.

2021 yilda xususiylashtirish to‘g‘risidagi farmon chiqdi va shu asosda avtobuslar auktsionga qo‘yildi, dastlabki bahosi 2,7 mlrd bo‘lsa-da, narx 8,5 mlrd so‘mga chiqdi.

Eltuzga kelgan ma'lumotga ko‘ra, agentlik rahbari M. Radjapov avtobuslar uchun 5 kun ichida mablag‘ning 30 foizini to‘lashni talab qilgan, bu bajarilmaganidan keyin avtobuslar “Sharh Nukus”ga uch yillik to‘lov bilan sotilgan.

Ammo “Sharh Nukus” bitta to‘lovni ham o‘z vaqtida amalga oshirmagan, hatto 2024 yilgacha davlat g‘aznasiga bir tiyin ham tushmagan.

Shundan keyin Radjapov sudga murojaat qilib, 8,5 milliard so‘mlik to‘lov majburiyatini bekor qildirgani aytiladi.

Bugunga kelib, Ipoteka bank qarzi 14 milliardga, Transport vazirligiga qarz 6 milliardgacha yetgan, auktsion pullari ham yo‘q.

Avtobuslar esa abgor holda yotibdi, xizmat ko‘rsatish o‘rniga temir-tersakka aylanyapti.

2025 yilda “Avtotrans Shimbay”ning o‘zi 1,9 milliardga sotilgani, lekin bu pul ham byudjetga tushmagani aytiladi.

Bu jarayonlarni nazorat qilishi kerak bo‘lgan mas'ul rahbar mansab vakolatini suiiste'mol qilgani haqida da'volar bor, yuborilgan rasmiy murojaatlar esa javobsiz qolgan.

Natijada xalq uchun mo‘ljallangan 100 ta avtobus ham, ular ortidan yurgan milliardlar ham yo‘llari yo‘qolgan bir piramidaga aylandi.