Talabalari kaltaklagan domla prezidentdan najot kutmoqda

Namangan muhandislik texnologiya institutining sobiq domlasi, talabalari tomonidan kaltaklanganini aytayotgan Sirojiddin Ashurov jinoyatchilar tegishli jazoni olishida prezidentdan najot kutmoqda.

Besh yildan buyon adolat qaror topishi uchun kurashayotgan o‘qituvchi o‘z niyatiga yeta olmagani sababli prezidentga videomurojaat yo‘lladi.

Sirojiddin Ashurov 1950 yilda tug‘ilgan. Hozir pensiyada. 30 yildan ortiq davr mobaynida Namangandagi oliy o‘quv yurtlarida faoliyat yuritgan. Oxirgi 15-20 yil davomida Namangan muhandislik texnologiya institutida ishlagan.

“Sinov va imtihonlar qabul qilgandan so‘ng ishdan uyga qaytayotgan edim. Bu kechki 8:30 lar atrofida edi. Menga orqa tomondan bir necha talaba hujum qildi. Ular to‘mtoq jism bilan urib boshimni yorishdi. Keyin esa 15 minut kaltaklashdi. So‘ng nimadandir qo‘rqib qochib ketishdi”, deb voqeani bayon qiladi S.Ashurov.

Aytishicha, u o‘zini kaltaklagan talabalarni tanigan. Ularning asosiylari Egamberdiev Bobur, Umurzoqov Akmal va Sultonov G‘ulom bo‘lgan. Usmonov Sherzod, Nazarov Farhod va boshqalar ularga yordam bergan.

Domlaning so‘zlariga qaraganda, ular dars qoldiradigan, intizomsiz talabalardir. S.Ashurov bu talabalarga asosli ravishda sinov va imtihonlardan baho qo‘ymagan.

“Shuning uchun meni o‘ldirmoqchi bo‘lishdi, suiqasd qilishdi. Ular meni o‘yindan chiqarib, institutdan tegishli qoniqarli baholarni mensiz olmoqchi bo‘lishdi”, deydi sobiq o‘qituvchi.

S.Ashurovning ma'lum qilishicha, bu jinoyat bo‘yicha tergovda u aytganlarining hammasini isbotlab, asoslab bergan. Shunga qaramay, jinoyatchi talabalar javobgarlikka tortilmagan. Buning ustiga, jinoyat ishi harakatdan to‘xtalgan. Tergovchilar buning sababini jinoyat sodir etilganidan buyon besh yil o‘tgani bilan izohlagan.

“Aslida menga hujum qilganlardan biri Sultonov Akmalning otasi A'zam Sultonov o‘sha vaytda viloyat hokimining birinchi o‘rinbosari bo‘lib ishlardi. Aynan shuning uchun bu jinoyatchilarni jazoga tortishning imkoni hozirgacha bo‘lmay kelyapti”, deya noliydi sobiq o‘qituvchi.

Uning ta'kidlashicha, bu jinoyatda bosqinchilik va talon-taroj, suiqasd alomatlari mavjud. Xususan, hujum qilgan talabalar uning ichida pullar, jurnallar, vedomostlar bo‘lgan papkasini olib ketishgan. Jinoiy guruh bo‘lib o‘ldirishga urinish bo‘lgan. Ammo shu paytgacha tergov bu jihatlarga umuman e'tibor qaratgani yo‘q.

Ish sudgacha ham yetib bormagan. Holbuki, jabrlanuvchi ham mahalliy, ham respublika huquq-tartibot organlariga murojaat qilgan.

Bundan tashqari, mazkur jinoyat sodir etilgan so‘ng S.Ashurov ishdan haydalgan. Bu ish talabalar hech bir qarshiliksiz imtihon va sinovlarni topshirishi uchun uyushtirilgan. Shundan so‘ng bu talabalar diplom himoya qilib, o‘qishni ham tamomlashgan.

“Men sizdan bu ishga shaxsan aralashishingizni so‘rayman.. Chunki shusiz men adolatni qaror toptira olmayaman. Qo‘limdan hech narsa kelmayapti”, deb yakunlaydi o‘z murojaatini talabalari tomonidan kaltaklangan sobiq o‘qituvchi.