Xalqaro jinoyatchilar ro‘yxatidagi G‘afur Rahimov AIBA prezidenti bo‘ldi

Xalqaro Olimpiya qo‘mitasi noroziligiga qaramay, 3 noyabr kungi majlisida AIBA – Xalqaro havaskor bokschilar uyushmasi 66 yashar G‘afur Rahimovni prezidentlikka tasdiqladi.

AQSh Moliya vazirligi ro‘yxatiga «jinoiy sindikat» rahbarlaridan biri sifatida kiritilgan o‘zbekistonlik G‘afur Rahimov saylovdagi raqibi, uyushma vitse prezidenti Serik Qo‘noqboevdan ko‘proq ovoz qozonib, AIBA prezidenti bo‘ldi.

Rasmiy xabarlarga ko‘ra, AIBAning Moskvada o‘tgan kongressida 137 delegatdan 86 tasi Rahimovga, 48 tasi Qo‘noqboevga ovoz bergan.

Saylovdan oldin G‘afur Rahimov jinoyat olamiga aloqasi yo‘qligini isbotlashga urinib, AQShning Around the Rings nashriga bergan intervyusida o‘ziga qarshi «ayblovlarni  Gulnora Karimova va uning guruhi» tarqatgani haqida bildirgan edi.

Eltuz.com