Mahmud Rajab va uning tarafdorlari Toshkentga qarab yurish boshlashdi

O‘zbekiston «Erk» demokratik partiyasi a'zosi, shoir va jurnalist Mahmud Rajab adolat istab 22 sentyabr kuni Xorazmdan Toshkentga qarab yo‘lga chiqdi.

Sumkasidan Muhammad Solih kitoblari chiqqani uchun tergovga tortilganidan norozi 56 yashar Mahmud Rajab, uning qarindoshlari va tarafdorlari Toshkentga, ichki ishlar vaziri Po‘lat Bobojonov bilan uchrashuvga yayov yurib borishni rejalaganini aytishmoqda.

Bundan avval, 20 sentyabr kuni, «Eltuz» olgan xabarlarga ko‘ra, Mahmud Rajabni olib ketish uchun militsiya kapitani Bekchanov boshchiligida Xorazm viloyati IIB xodimlari kelishgan. Biroq shoirning mahalladoshlari uni militsiya olib ketishiga qarshilik ko‘rsatishgan.

“Mening xalq oldida ham, vijdonim oldida ham, hukumat oldida ham, qonun oldida ham hech qanday aybim yo‘q.

O‘zimni o‘zim insoniylik printsiplaridan kelib chiqib himoya qilaman. Chunki bu meni 5 yil qamashga qaratilgan, meni ko‘ra olmaydigan birovlarning ishi”, dedi mahalladoshlari va videokamera oldida Mahmud Rajab.

Eslatib o‘tamiz, Mahmud Rajab shoir Muhammad Solih asarlarini O‘zbekistonga olib kirganlikda asossiz ayblanib tergovga tortilgan. “Eltuz” nashri shoir Mahmud Rajab taqdiri bilan bog‘liq voqealarni kuzatishda davom etadi.

Voqea joyidan mustaqil jurnalist Shabnam Olloshukurova to‘g‘ridan to‘g‘ri videoreportajlar jo‘natmoqda. Voqealar rivojini «Eltuz» kanalida ham kuzatishingiz mumkin.

Eltuz.com