IIB xodimlari paxtani topshirmagan fermerni kaltakladi

2022 yil 28 sentyabr kuni Payariq tumani “Yakkasaroy” MMTP hududidagi “Oqqush zamin dalasi” fermer xo‘jaligiga tegishli paxta egasining roziligisiz majburiy tarzda olib ketildi. Boz ustiga, paxtaning egalari kaltaklandi.

Ma'lum bo‘lishicha, fermer xo‘jaligi ishchisi Doston Esirgapov xo‘jalik dalasida terilgan paxtani uchta tirkamaga ortib, “Payariq klaster” MChJga qarashli paxta qabul qilish punktiga olib borgan.

Ammo laboratoriyada paxtaning navi past baholangach, Esirgapov uni tozalab qayta topshirish maqsadida fermer xo‘jaligi raisi bo‘lgan akasi Muhiddin Islomovning uyi oldida tirkamalarni qoldirgan.

Ammo shu kuni yarim tunda tuman IIB xodimlari kelib, tirkamalardagi paxtani qabul punktiga topshirishni talab qilgan. Muhiddin Islomov ertalab topshirishini aytganida, IIB xodimlari uni haqoratlab, tahdid qilishgan. Oradan bir necha soat o‘tib, paxta ortilgan 2 ta tirkamani IIBning 4 nafar xodimi hech qanday hujjatsiz va fermerning ruxsatisiz olib ketgan.

Aka-uka fermerlar o‘z paxtasini sarson bo‘lib izlab, Chelak paxta qabul qilish punktidan topgan. IIBning bir necha xodimi ularni bu yerda ko‘rib, aka-ukani bo‘limga olib ketgan va qattiq kaltaklab, tan jarohati yetkazgan.

Doston Esirgapov boshiga tekkan zarbdan hushini yo‘qotgan. Ammo IIB xodimlari birinchi yordam ko‘rsatmagan. Shundan so‘ng Esirgapovni Chelak tumani shifoxonasiga akasi olib kelgan va u hanuz davolanmoqda.

“Ular men va akamning qo‘limizni qayirib, bo‘limga olib kirib ketishdi. Bo‘limdagi zalning chirog‘ini o‘chirishib, panjara va eshiklarni qulflashdi. Ichkarida 2 navbatchi xodim, bular 4 kishi, jami 6 kishi bizni urishdi. Men u yerdan hushsiz chiqdim. Boshim yorildi, uni tikishdi. Bugun shifoxonadan chiqdim”, dedi Doston Esirgapov “Eltuz” bilan suhbatda.

Uning aytishicha, IIBning zo‘ravon xodimlari go‘yoki o‘zlariga tan jarohati yetkazilgani bahonasida jabr ko‘rgan kimsalar sifatida hozir tibbiy ekspertizadan o‘tib yuribdi.

Klaster va fermer o‘rtasidagi muammoga IIB xodimlari nega aralashib yurgani, bundan kim manfaatdor ekani borasidagi savollar hozirgacha ochiq qolib kelmoqda.