Namanganlik 42 yashar erkak aqidaparastlikda ayblanib uch yilga qamaldi

Joriy yilning 25 oktyabr kuni, jinoyat ishlari bo‘yicha Namangan tuman sudi, 42 yashar MBni internetda “diniy aqidaparastlik g‘oyalarini targ‘ib qilish, O‘zbekiston Respublikasiga olib kirish va tarqatish”da ayblab 3 yil ozodlikdan mahrum qildi.

Eltuzda nusxasi bo‘lgan jazo hukmida bildirilishicha, MB «Redmi note 8 pro» rusumli telefoni orqali Odnaklassniki saytida profil ochib, shu akkaunti orqali internetdagi “turli g‘oyaviy zararli materiallarni” tomosha qilgan, ularga “klass” bosgan va tarqatgan.

Jinoyat ishi hujjatlariga ko‘ra, Odnaklassniki saytiga qo‘yilgan “Ustoz Abdulloh domlaga Ustoz Abu Saloh domladan rad”, Rafiq Kamolovning “8-mart bayrami haqida”, “benamozlik haqida” kabi  postlari shular jumlasidandir.

Eltuz o‘rgangan tergov materiallarida, jumladan, ayblanuvchining Odnaklassniki saytidagi “12 ta guruhga a'zo bo‘lgani, 99 ta foto, to‘rtta qaydlar joylagani, shuningdek profilining “Lenta” qismida turli xil video, audio, fotolarga munosabat bildirgani qayd etilgan.

2023 yilning 2 iyunida MB Namangan shahar IIB tezkor xodimlari tomonidan bir nechta xolislar va guvohlar ishtirokida qo‘lga olindi.   

Dastlabki tergov materiallari, ekspertlar hulosasiga tayanib sud uni JKning 244-moddasi 3 qismining “g” bandidagi jinoyatni qilishda aybdor deb topdi.

Mavsumiy ishchi bo‘lgan MB muqaddam sudlanmagani, chin ko‘ngildan pushaymonligi, oilada yolg‘iz boquvchi ekani, qaramog‘ida to‘rt nafar voyaga yetmagan farzandlari borligi inobatga olinib jazo yengillashtirildi va ozodlikni cheklash jazosini yashash joyida o‘tashi tayinlandi.

Eltuz.com