Ona va bola molxonada besh oy qiynoqqa solindi

Surxondaryo viloyatining Uzun tumanida jamiyatni larzaga soluvchi zo‘ravonlik holati aniqlandi. Eltuzga kelgan ma'lumotlarga ko‘ra, ayol besh oy davomida eri, qaynonasi va qaynisinglisi tomonidan shafqatsizlarcha kaltaklangan, haqoratlangan va uyning molxonasida bog‘lab qo‘yilgan.

Ayol oyoq-qo‘llaridan bog‘lanib, somonxonada och qoldirilgan. Unga na ovqat, na suv berilgan. 

Zo‘ravonlik qurboni bo‘lgan ayol shu holatda homiladorlikni o‘tkazib, somonxonada bola tug‘ishga majbur bo‘lgan. Bola uch oydan oshgan bo‘lsa-da, hanuzcha fuqarolik qaydnomalarida yo‘q.

Qo‘shnilar esa holatdan xabar topib, bir necha oydan so‘nggina ichki ishlar idoralariga murojaat qilishgan.

Shifokorlarning aytishicha, bola uzoq vaqt ovqat va suvsiz qolgani uchun og‘ir ahvolda. Onaning ham sog‘lig‘i keskin yomonlashgan, u shifoxonada ko‘rgan har bir odamdan «Iltimos, urmang» deb yolvorgan.

Jamoatchilik bu razillikka ko‘z yumib bo‘lmasligini ta'kidlamoqda. Adolatli javobgarlik va qattiq jazo talab etilmoqda.

Ushbu fojea kimsasiz, yordamsiz insonlar taqdiri qay darajada xavf ostida ekanini yana bir bor ko‘rsatdi. 

Bu jinoyatga javobsizlik — jamiyat uchun yanada katta fojea bo‘ladi. Eltuz O‘zbekistonda gender tengsizligi, ayollar va bolalarga zo‘rovonlik holatlarini yoritishda davom etadi. Kanalimizga obuna bo‘ling. Video yuzasidan izoh qoldiring.