Paradoks: O‘zbekiston AQShdan paxta sotib oladi

O‘zbekiston AQShdan samolyotlar, dukkakli donlar va tonnalab paxta sotib oladi hamda amerikaliklar uchun vizasiz tartib joriy etadi

AQSh Davlat departamenti O‘zbekiston prezidenti Shavkat Mirziyoevning Vashingtonga tashrifi chog‘ida imzolangan kelishuvlar tafsilotlarini oshkor qildi. 

Unga ko‘ra, Toshkent amerikalik kompaniyalarga kamyob yer metallari konlariga kirish imkonini yaratadi, shuningdek, AQShdan 2 million tonna soya donlari, 22 ta Boeing-787 Dreamliner samolyoti va kichik atom reaktorlarini jami 8,5 milliard dollar qiymatida xarid qiladi.

Eng qiziq jihat shundaki, kelishuv doirasida O‘zbekiston — dunyoning eng yirik paxta ishlab chiqaruvchi mamlakatlaridan biri bo‘lishiga qaramay, 100 ming tonna amerikon paxta sotib olish bo‘yicha uch yillik shartnoma tuzdi.

AQSh prezidenti Donald Tramp ta'kidlashicha, bu kelishuv O‘zbekistonni kelgusi o‘n yil ichida Amerika iqtisodiyotining “asosiy sohalariga” 100 milliard dollardan ortiq investitsiya kiritishga majbur qiladi.

Shuningdek, O‘zbekiston UzAuto Motors avtomobil yig‘ish kompaniyasini xususiylashtirish jarayonida AQSh bilan hamkorlikni kengaytirishni va 2026 yildan amerikaliklar uchun 30 kunlik vizasiz tartib joriy etishni rejalashtirmoqda.