Farg‘onada xotinini tiriklayin yoqib yuborgan erkak 15 yilga qamaldi 

Farg‘ona viloyatida 36 yoshli erkak M.T. xotini Sh.T. ni kimsasiz joyga olib borib, urib, tiriklayin yoqib yuborgan. U buni xotinining xiyonati sabab qilganini iddao qilgan. 

Tergov ma'lumotlariga ko‘ra, erkak uzoq vaqt davomida rafiqasi bilan rashk tufayli janjallashib kelgan. Voqea sodir bo‘lgan kuni soat 12:00 atrofida er-xotin o‘rtasida yana janjal kelib chiqqan. Ayblanuvchi ayolni uydan kuch bilan olib chiqib, Matiz avtomobiliga itarib yuborgan, shundan so‘ng bir litr benzin sotib olib, mashinaga olib kirgan.

U xotinini kimsasiz joyga olib chiqib, o‘z joniga qasd qilish niyati borligini aytib, onasi uchun video yozib berishini talab qila boshlagan. Rad javobini olgach, erkak jabrlanuvchini ayovsiz kaltaklagan, o‘zini esa o‘tkir jism bilan jarohatlangan. Shundan so‘ng ayolini  benzin sepib, yoqib yuborgan.  Jabrlanuvchi yonidan oqib o‘tayotgan daryoga o‘zini tashlab, qochishga uringan. Ayolni shu atrofda ishlayotgan dehqonlar ko‘rib qolishgan va uni suvdan chiqarib, yordam berishgan. Ammo kech edi. 

Jabrlanuvchi og‘ir ahvolda shifoxonaga yotqizilgan. Shifokorlarning sa'y-harakatlariga qaramay, bir necha kundan so‘ng og‘ir kuyish oqibatida vafot etdi.

 Sud aybdor M.T ni Jinoyat kodeksining 97-moddasi 2-qismi “j” bandi (O‘ta shafqatsizlik bilan qasddan odam o‘ldirish) bilan aybdor deb topib, 15 yilga ozodlikdan mahrum qildi.

Eslatib o‘tamiz, Farg‘onada erkak xotini va ikki nafar yosh bolasini o‘ldirgandi. Holat yuzasidan fuqaroga nisbatan jinoyat ishi qo‘zg‘atilib, tergov harakatlari boshlangandi. Buxoroda er xotinini rashkdan bug‘ib o‘ldirgan edi. Er 13 yil ozodlikdan mahrum etilgandi.