Ўзбек тармоғида Жоҳар Дудаев ўгитлари пайдо бўлди

«Агар ҳозирги оталарнинг қўрқоқлиги эҳтиёткорлик деб аталса, албатта, шундай вақт келади, болаларнинг қуллиги садоқат деб аталади».

Чеченистоннинг биринчи президенти, марҳум Жоҳар Дудаевнинг бу сўзлари 5 май куни Россияда Путинга қарши «У бизга подшо эмас» (Он нам не царь)шиори остида ўтказилган намойишларнинг бостирилиши ортидан ижтимоий тармоқда ўзбекларнинг сустлигига ишора тарзида бот-бот такрорланмоқда.

Масалан, журналист Карим Баҳриев, кинорежиссёр Абдулазиз Маҳмудов бу сўзларни кўчириб, фейсбукдаги ўз ленталарига қўйишди.

Дудаев иқтибоси Тошкентдаги 9 май олдидан ўтказилаётган россияпараст гуруҳларнинг акцияларига қарши ишора тарзида ижтимоий тармоқда пайдо бўлган эди.

«Эрта тонгдан яхши бир инсоннинг ўта ноёб фикрига дуч келдим. Бу инсонни охирги рус империясининг бизнинг орамиздан юлиб олинган энг буюк қурбонлардан бири, десак бўлади. Мана унинг бизлар учун қолдирган сўзлари: «Если трусость нынешних отцов называют осторожностью, обязательно наступит время, когда рабство детей назовут преданностью». Ж.Дудаев.

«Агар ҳозирги оталарнинг қўрқоқлиги эҳтиёткорлик деб аталса, албатта, шундай вақт келади, болаларнинг қуллиги садоқат деб аталади. Ж.Дудаев», дея изоҳ ёзди, жумладан, 3 май куни Дудаев сўзларини таржима қилиб фейсбук саҳифасига қўйган ўзбек психолог олими Маҳмуд Йўлдошев.

Eltuz.com