Дарёни қуритаётганларга ким стоп дейди?

Элтузга жўнатилган хавотирли мактуб ва видеода Самарқандда дарёни қуритиб, ҳудуд экологиясига зарар етказаётган ширкат ҳақида билдирилган.

Самарқанд вилояти Пайариқ тумани Зарафшон маҳалласи ҳудудидан Оқдарё оқиб ўтган. «Мардона қурилиш стил» МЧЖ шу дарёдан ноқонуний тош, шағал қазиб олмоқда. Бу ҳақида маҳаллий аҳоли масъул ташкилотларга бир неча бор мурожаат қилиб, бирор натижага эришмаганини таъкидламоқда. 

Маълумки, назоратсиз тош қазиб олиш истиқболда дарё сатҳи пасайиб, сув кескин камайишига сабаб бўлади. Оқдарёдан эса куну-тун тўхтовсиз тош-шағал олинмоқда. 

Бир пайтнинг ўзида 3-4 техника тош қазиб оляпти. Экологиядан бирор киши келиб текширмайди. Қайта-қайта Экология ташкилотига хабар берамиз. Лекин бу корхона тош қазиб олмаяпти деган очиқ ёлғон жавоб оламиз» – дейди маҳаллий аҳоли.

Зарафшон маҳалла аҳли бу ўзбошимча талончиликдан ҳавотирда. «Мардона қурилиш стил» МЧЖ аллақачон бир туманга етадиган тош заҳирасини қазиб олди. Оқдарёни талон-торож чангалидан ким қутқаради?

Оқдарёда содир бўлаётган дарё ўзанини ковлаш билан боғлиқ холат биргина Самарқанд вилоятига таалуқли эмас. 2024 йилнинг августида Элтуз Сариосиёдаги Тўпаланг дарёси ўзанидан ноқонуний қум товон олиб кетилишига оид мақолани чоп этган эди.

Энг ачинарлиси дарё ўзани ноқонуний қазишлар натижасида 10–15 метрга пасайган. Бу ўз навбатида ер ости сувларининг ҳам камайишига сабаб бўлган ва натижада атрофдаги аҳоли сувсизликдан азият чекмоқда. 

Элтуз Ўзбекистоннинг экологиясига ҳавф солувчи жиноятларга оид воқеаларни таҳлил қилишда давом этади. Каналимизга обуна бўлинг. Видео юзасидан изоҳлар қолдиринг.