Андижонда ўқитувчилар мажбурий меҳнатга тортилмоқда

Андижон тумани 35-мактаб атрофида 30 ноябрь куни Элтузда эълон қилинган шикоятдан сўнг вазият янада оғирлашди. Ўқитувчилар Элтузга иккинчи мурожаат йўллаб, ҳақиқатни ёпиш учун уларга босим ўтказилганини маълум қилишди.

30 ноябрдаги хабарда айтилишича, Ички ишлар вазири ташрифи олдидан ўқитувчилар мажбурий равишда мактаб тозалаш ишларига жалб қилинган. Уларнинг орасида ҳомиладор устозлар ҳам бўлган.   

1 декабрда эса мактабга Ички ишлар ходимлари келиб, ўқитувчилардан тушунтириш хати олган. Устозлар айтишича, улар қўрққанидан ўз хоҳишлари билан ишлагани ҳақида тушунтириш хати ёзишга мажбур бўлганлар. 

Энг ёмони, мактаб директори Х. Шаробиддинов ўқитувчиларни тозалик ишларини қилмасанг ишдан бўшатаман деб қўрқитмоқда. Устозлар таъкидлашича, янги директор даврида ҳам ишдан ҳайдаш билан таҳдид қилиш доимий босим воситасига айланган.

Устоз ўз вазифасини бажариши керакми ёки мактаб ҳовли супуриши керакми?

Қонун мажбурий меҳнатни тақиқлайди. Ҳурматли раҳбарлар эса бу қонунни менсимай, ўқитувчиларни арзон ишчи кучига айлантиришни давом эттирмоқда.

35-мактаб ўқитувчилари Элтуздан нажот кутмоқда. Улар ишидан айрилмаслик учун ҳақиқатни очиқча айтишга қўрқишади, аммо кўтарилган муаммога ечим топилмагани уларнинг тинчини бузган.

Бу воқеа бутун таълим тизимидаги муаммонинг очиқ мисоли. Устозни қадрламас эканмиз, таълимдан қандай натижа кутамиз?

Тегишли идоралар бу ҳолатга дарҳол жавоб бериши, мажбурий меҳнат ва таъқибни тўхтатиши шарт.