Рамзаннинг ўғли Адам Қодиров автоҳалокатга учради

«Кавказ.Реалии» нашри ўз манбаларига таяниб хабар беришича, Рамзан Қодировнинг ўғли йирик йўл-транспорт ҳодисасидан сўнг шифохонага ётқизилган. Маълумотларга кўра, Адам Қодиров Грознийдаги Республика клиник шифохонасига ЙТҲдан кейин олиб келинган ва у оғир аҳволда бўлиши мумкин.

Чечен мухолифат ҳаракатига тегишли NIYSO Telegram-канали ёзишича, авария Грозний шаҳрида содир бўлган. Қодиров кортежи, «одатдагидек, юқори тезликда — машина ортидан машина ҳаракатланаётган пайтда, тўсатдан тўсиққа дуч келган. Натижада автомобиллар бир-бирига урила бошлаган».

Кўплаб жабрланганлар орасида яна бир юқори лавозимли чечен раҳбарининг ўғли ҳам бўлиши мумкин, аммо унинг исми ошкор қилинмаган.

Хабарларда таъкидланишича, шифохона яқинидаги проспект ёпиб қўйилган, Грозний шаҳрига кириш жойларида эса автомобил тирбандликлари кузатилмоқда.