Ўлпонлардан тадбиркорнинг боши қотмоқда

Президент Мирзиёев 2016 йилнинг 5 октябрида чиқарган фармони жорий йилнинг 1 январдан бошлаб тадбиркорларга нисбатан режадан ташқари ҳар қандай норасмий текширишларни бекор қилишни кўзлаган эди.

Бироқ фармонда, ҳокимият амалдорлари тажрибасида кенг қўлланиладиган «норасмий ўлпон» ундириш ҳолатлари ҳақида гапирилмаган.

Яқинда шундай «солиқларнинг» кўпайганидан бир гуруҳ самарқандлик тадбиркорлар Озодлик радиосига шикоят қилишди.

«Умуман инсоф чегарасидан чиқиб кетишди. Бир ой ичида учинчи марта биздан миллионлаб ўлпон ундиришаяпти”, дейди тадбиркорларнинг бири.

Самарқандлик тадбиркорларнинг билдиришича, кўчаларга ўрнатиладиган “видеокамера”, «болалар спорти», «Наврўз», «ободонлаштириш» каби иддаолар тадбиркорларни шилиш учун келтириладиган баҳоналарнинг айримларидир.

Бу каби ўлпонлар айниқса, аҳолининг Мирзиёевга шикоятлари натижаси ўлароқ, вилоятларга кўплаб тафтишчилар жўнатилганидан сўнг авжига чиққани ҳам иддао этилмоқда.

«Озми-кўпми пул топган тадбиркор барча муаммоларнинг балогардони бўлиб қолмоқда», дейди бу ҳақда Элтузга расм жўнатган рассом Элсевар.

Мирзиёевнинг фармони эҳтимол тадбиркорларни норасмий текширишга чек қўйгандир, бироқ уларларга солинадиган норасмий ўлпонларга бунинг даҳли йўқдай кўринади.

Рассом Элсевар
Eltuz.com