БТРлардан янграган қўшиқ мунозарага сабаб бўлди

Жорий йилнинг апрели бошидан Тошкент кўчаларида БТРларда юриб, карантин боис карнайлар орқали аҳолини уйда қолишга даъват этиш бошланди.

Бироқ тармоқда БТРлардан ҳам кўра, карнайдан янграётган хонанда Рашид Холиқовнинг «Эй, азиз юртим!» қўшиғидан норозилик кўзга ташланди.

Фейсбукдаги «Халқ билан мулоқот» гуруҳидаги айни мавзу остига қисқа вақт ичида 500 дан зиёд ёзилди.

Кимдир БТРлардан умуман қўшиқ қўймасликни, кимдир ҳарбий вертолётларга карнайлар ўрнатиб, бу ишни ривожлантиришни таклиф қилди.

«Пойтахт кўчаларида ҳарбий техникалар б-н халқни карантин тартибига риоя қилишга чорлаб юрганларга минг раҳмат. Аммо БТР ичидан янграётган Рашид Холиқовнинг » Эй, азиз юртим» қўшиғи кўпчилик қаторида маниям энсамни қотиряётганини яширмайман. Ундан кўра Севара Назархоннинг карантиндаги жасорати намунаси ўлароқ, » Улуғимсан, Ватаним» қўшиғи яхши эмасми?» деб ёзди фейсбук юзери Гулшода Қурбонова.

Унинг тағин ёзишича, «Юлдуз Усмонованинг «Ҳеч кимга бермаймиз сени Ўзбекистон!» қўшиғиниям не в тема».

Улуғбек исмли юзер «Настарин гули майда…»ни қўйишни таклиф қилди.

Бир зумда Рашид Холиқов ва Севара Назархон ишқибозлари тарафма-тараф бўлишди. Кимгадир Рашид Холиқовнинг пиширган қозон кабоби ёқмади, кимгадир Севаранинг овози…

Мунозара гуруҳ маъмурининг изоҳларни тўхтатиш талабигача давом этди.

Eltuz.com