Омон Азиз: «Ҳайкалларни кўчиришдан бошқа иши йўқми буларнинг?»

9 май куни Шомаҳмудовлар ҳайкали қайта очилди. Тошкентлик тахлилчи Анвар Назир фикрига кўра, бу ҳайкал совет даврини қўмсаган ўзбекистонликлар учун рамзга айланган.

Ҳайкалтарош ва кандакор рассом Омон Азиз Ўзбекистонда ҳайкалнинг кўчирилиб учинчи бор қайта очилишини мантиқсизлик дея атади.

«Уларнинг бошқа иши йўқми, деган савол туғилади» деди Элтуз мухбирига берган интервьюсида 75 ёшли ҳайкалтарош Омон Азиз.
Шомахмудовлар композицияси 1982 йил йили Дмитрий Рябичев томонидан яратилганди.

25 йилдан буён Америкада яшаётган ижодкор Омон Азиз совет даврида бутун Тошкент ҳайкалтарошлиги Шапиро билан Рябичев ихтиёрига ўтиб қолганини айтди.

Тағин унинг сўзларига кўра, 80 йилларда уруш мавзуидаги Абдумўмин Бойматов, Дамир Рўзибоев каби ўзбек ҳайкалтарошларининг асарлари танловга қўйилган.

«Абдумўмин аканинг «Сен етим эмассан» композицияси ўша Рябичевникидан кўра яхшироқ эди. Ҳудди шошмақом мусиқасини эслатарди, бетакрор эди», дея эслайди Омон Азиз ўша танловга қўйилган асарни.

Рябичевнинг беқиёс санъаткор эканини эътироф этаркан, санъаткор сифатида ҳайкалнинг айрим нуқсонларини санайди.

«Масалан, мен эркакнинг нима учун тикка турганини билмайман. Лекин болалар яхши топилган», дейди Омон Азиз.

Шунга қарамай у ҳайкалларни кўчирмаслик керак деган фикрда.

2008 йили Шомаҳмудовларга oрнатилган ҳайкал «Халқлар дўстлиги» майдонидан кўчирилган. Каримов даврида эса бу майдон «Истиқлол» дея ўзгартирилганди.

Eltuz.com